एजेन्सी – क्याटलान क्लब बार्सिलोना युरोपा लिगको नकआउट चरणमा प्रवेश गरेको छ । इटालियन क्लब नेपोलीलाई दोस्रो लेगमा ४–२ ले पराजित गर्दै बार्सिलोनाले अन्तिम १६ मा स्थान पक्का गरेको हो ।

बार्सिलोनाले समग्रमा ५–३ को जित निकालेको हो । पहिलो लेग १–१ गोलको बराबरीमा सकिएको थियो । डिएगो अर्मान्डो म्याराडोना स्टेडियम नेपोलीमा बिहीबार राति भएको खेलमा बार्सिलोना घरेलु टोलीविरुद्ध पूरै हावी बन्दै सहज जित निकाल्न सफल भयो ।

बार्सिलोनाको जितमा जोर्डी अल्वा, फ्रान्की डि जोङ, जेरार्ड पिके र पिएरे इमरिक औवामियाङले गोल गरे । नेपोलीका लोरेन्जो इन्सिग्नेले एक गोल फर्काए ।

खेलको आठौं मिनेटमा जोर्डी अल्वाले एडमा ट्राओरेको पासमा गोल गर्दै बार्सिलोनालाई सुरुवाती अग्रता दिलाए । १३औं मिनेटमा फेरान टोरेसको पासमा फ्रान्की डि जोङले गोल गर्दै बार्सिलोनाको अग्रता दोब्बर पारे । २३औं मिनेटमा लोरेन्जो इन्सिग्नेले पेनाल्टीमा गोल गर्दै खेललाई २–१ को अवस्थामा ल्याए ।

४५औं मिनेटमा जेरार्ड पिकेले गोल गरेपछि बार्सिलोना पहिलो हाफमा ३–१ को आरामदायी स्थितिमा पुग्यो । ५९औं मिनेटमा पिएरे इमरिक औवामियाङले ट्राओरेको पासमा गोल गरेपछि बार्सिलोना ४–१ ले अघि बढ्दै सहज जिततर्फ अघि बढ्यो ।

८७औं मिनेटमा माटियो पोलिटानोले गोल गर्दै खेललाई ४–२ को अवस्थामा ल्याएपनि त्यसपछि थप गोल निस्कन नसक्दा बार्सिलोना विजयी हुन सफल भयो ।