काठमाडौं (हाम्रो खेलकुद)– सहिद स्मारक ए डिभिजन लिग सकिन ३ दिन बाँकी रहँदा सञ्जिव मिश्रले अखिल नेपाल फुटबल संघ (एन्फा) को लिग निर्देशक र प्रतियोगिता निर्देशकबाट राजीनामा दिएका छन् ।

अध्यक्ष कर्मा छिरिङ शेर्पालाई सम्बोधन गरिएको राजीनामा पत्र मिश्रले एन्फा महासचिव इन्द्रमान तुलाधरलाई मंगलबार बुझाएका हुन् । झण्डै चार वर्ष लिग निर्देशकका रुपमा काम गरेका मिश्रले सो पदबाट राजीनामा गरेको यो दोस्रो पटक हो । यसअघि अध्यक्ष शेर्पाको अनुरोधमा मिश्रले राजीनामा फिर्ता गरेका थिए ।

महासचिव तुलाधरले मंगलबार मिश्रले आफूलाई राजीनामा पत्र बुझाएको बताएका छन् । ‘उहाँले व्यक्तिगत कारण देखाउँदै लिग र प्रतियोगिता निर्देशकको पदबाट राजीनामा दिनुभएको छ । त्यो अहिले पनि मैसँग छ,’ उनले भने, ‘अध्यक्ष ज्यूलाई सम्बोधन राजीनामा पत्र लेख्नुभएको छ ।’

एन्फामा पूर्व सहायक महासचिवको जिम्मेवारी निर्वाह गरिसकेका मिश्रलाई वर्तमान कार्यसमितिले २०७५ असार २९ गते लिग निर्देशकका रुपमा नियुक्त गरेको थियो । एन्फा कार्यसमितिको २०७५ असार १२ गते बसेको बैठकले मिश्रलाई लिग निर्देशकका रुपमा मनोनयन गरेको थियो ।

कुनै समय ए डिभिजन क्लबमा रहेको काठमाडौं क्लबको लामो समय अध्यक्ष र व्यवस्थापक रहेका मिश्र २०६३ देखि लगातार एन्फामा विभिन्न भूमिकामा सक्रिय रहँदै आएका छन् । यसअघिको कार्यसमितिमा सहायक महासचिव एवंम् कार्यवहाक प्रवक्ता समेत रहेका मिश्रले प्रतियोगिता निर्देशक र विकास निर्देशकका रुपमा समेत काम गरिसकेका छन् । जारी ए डिभिजन लिग शनिबार सम्पन्न हुँदैछ ।