एजेन्सी – युइएफए च्याम्पियन्स लिगको प्रि–क्वाटरफाइनलको पहिलो लेगमा स्पेनिस क्लब एट्लेटिको म्याड्रिड र इंग्लिस क्लब म्यानचेस्टर युनाइटेडले बराबरी खेलेका छन् । एट्लेटिको र म्यानचेस्टरले १–१ गोलको बराबरी खेलेको हो ।

एट्लेटिकोको मैदान वान्डा मेट्रोपोलिटानोमा बुधबार राति भएको खेलमा घरेलु टोलीले सुरुवाती अग्रता लिएपनि त्यसलाई जोगाउन नसक्दा बराबरीमा रोकिन बाध्य बन्यो । एट्लेटिकोका जोआओ फेलिक्सले गोल गर्दा म्यानचेस्टरका एन्थोनी इलांगाले बराबरी गोल फर्काए ।

खेलको सातौ मिनेटमा नै जोआलो फेलिक्सको गोलबाट घरेलु टोलीले सुरुवाती अग्रता लिन सफल भएको थियो । रेनान लोडीको पासमा उनले अफसाइड बिट ट्याप गरेको हेडर पोलमा लाग्दै गोलमा परिणत भएको थियो । ४५औं मिनेटमा रेनान लोडीको क्रसमा सिमे भर्सलज्कोको हेडर पोलमा लागेर फर्कदा एट्लेटिको अग्रता दोब्बर पार्नबाट चुक्यो ।

८०औं मिनेटमा सब्सिच्युट विंगर एन्थोनी इलांगाले गोल गर्दै खेललाई १–१ गोलको बराबरीमा ल्याए । ७५औं मिनेटमा मार्काेस रासफोर्डको स्थानमा आएका उनले मैदान छिरेको पाँच मिनेटमै बराबरी गोल फर्काउन सफल भएका थिए । ब्रुनो फर्नान्डेसको चलाखीपूर्ण पासलाई रेइनिल्डोले स्लाइड दिदै बचाउने प्रयास गरेपनि नभेटेको बललाई एन्थोनी इलांगाले दोस्रो बरा च्याप्दै जाली चुमाएका थिए ।

यो बराबरीसँगै दुवै टोलीको च्याम्पियन्स लिगको क्वाटरफाइनल पुग्ने सम्भावना जीवित छ । एट्लेटिकोको तुलनामा म्यानचेस्टर युनाइटेडले अवे गोलको फाइदा लिन सक्नेछ । दोस्रो लेगमा यही नतिजा कायम रहे युनाइटेड अवे गोलको आधारमा क्वाटरफाइनलमा प्रवेश गर्नेछ । दोस्रो लेग १५ मार्चमा युनाइटेडको मैदानमा हुनेछ ।

अर्काे खेलमा पोर्चुगिज क्लब बेन्फिका र डच क्लब आयाक्सले २–२ गोलको रोमाञ्चक बराबरी खेलेका छन् । बेन्फिकाको मैदानमा घरेलु टोलीका रोमन यारेमचुकले गोल गर्दा एक गोल उपहार पाएको थियो । आयाक्सका डुसान टाडिक र सेवास्टिन हालेरले गोल गरे ।

यो बराबरीले दोस्रो लेगमा यही नतिजा कायम रहे अवे गोलको आधारमा आयाक्स क्वाटरफाइनलमा पुग्नेछ । बेन्फिाकालाई कम्तीमा पनि १–० को जितको खाँचो छ । दोस्रो लेग आयाक्सको मैदानमा १५ मार्चमा हुनेछ ।