काठमाडौं (हाम्रो खेलकुद) – राष्ट्रिय फुटबल टोलीका डिफेन्डर अनन्त तामाङले इन्डियन सुपर लिग (आइएसएल) क्लब स्पोर्टिङ क्लब इस्ट बंगालसँग औपचारिक रुपमा सम्झौता गरेका छन् । अनन्त आइएसएल क्लबमा अनुबन्धित हुने पहिलो नेपाली खेलाडी बनेका छन् ।

एससी इस्ट बंगालले आफ्नो फेसबुक पेजमार्फत भनेको छ, ‘सिजनको बाँकी अवधिका लागि नेपाली डिफेन्डर अनन्त तामाङसँगको सम्झौता भएको घोषणा गर्दा हामी खुसी छौं। ’ लिगमा दुई खेल बाँकी रहँदा टोली अंक तालिकाको पुछारमा छ । टोलीले अब नर्थ इस्ट युनाइटेड र बेंगलुरु एफसीसँग खेल्न बाँकी छ ।

अनन्तले अनुबन्धन पछि एससी इस्ट बंगालमा आबद्ध हुँदा खुसी लागेको र क्लबलाई सक्दो सहयोग गर्न आफु तयार रहेको बताएका छन् । उनले आफूलाई क्लबमा आबद्ध हुँदा गर्व महसुस भएको समेत बताएका छन् । अनन्त हाल क्वारेन्टिनमा छन् र भोलीबाट प्रशिक्षणमा सहभागी हुने बुझिएको छ । आइएसएलमा ७ दिने अनिवार्य क्वारेन्टिनको प्रावधान रहेको छ ।

गत साता उनको पूर्व क्लब थ्री स्टार क्लबले उनको विदाई गरेको थियो । थ्री स्टारका लागि ए डिभिजन लिग खेल्दा अनन्त गत महिना घाइते भएको थिए । त्यसयता चोटका कारण रिह्याबमा व्यस्त रहँदा गत महिना राष्ट्रिय टोलीको खेल पनि गुमाएका थिए । मौरिससविरुद्ध दशरथ रंगशालामा भएको दुवै खेलमा अनन्त विश्राममा थिए ।

अनन्तले यसअघि स्पेनको मार्बेला युनाइटेडमा प्रशिक्षण गरेका थिए । सुदूरपश्चिम फुटबल क्लबबाट राष्ट्रिय लिग खेल्दै घरेलु फुटबलमा प्रवेश गरेका उनको सन् २०१५ मा साफ यू–१९ च्याम्पियनसिप जित्दा चर्चा सुरु भएको थियो । नेपालले उपाधि जित्दा कार्यवाहक कप्तानका रुपमा विजयी पेनाल्टी प्रहार गरेका उनी त्यसयता नेपालको हरेक सफलतामा साथ रहँदै आएका छन् ।

सन् २०१६ को बंगबन्धु गोल्डकप, १२ औं दक्षिण एसियाली खेलकुद र सोलिडारिटी कपमा उनी टोलीका महत्त्वपूर्ण सदस्य थिए । सन् २०१९ मा १३ औं दक्षिण एसियाली खेलकुदको स्वर्ण जित्दा अनन्तले सानदार प्रदर्शन गरेका थिए । असोजमा साफ च्याम्पियनसिपमा नेपाल उपविजेता बन्दा पनि उनले सबै खेलमा सुरुवात गरेका थिए ।