एजेन्सी – इटालियन क्लब रोमाका पोर्चुगिज मुख्य प्रशिक्षक जोसे मौरिन्होलाई दुई खेलको प्रतिबन्ध लागेको छ । इटालियन फुटबल फेडेरेसनले उनलाई दुई खेलको प्रतिबन्धसँगै २० हजार युरो जरिवाना सुनाएको छ ।

यससँगै उनी अब इटालियन सिरी ‘ए’ मा स्पेजिया र एटलान्टाविरुद्धको खेलमा टच लाइनमा हुनेछैनन् । शनिबार राति हेलास भेरोनाविरुद्धको खेलमा रातो कार्ड पाएका थिए । हेलास भेरोनासँग २–२ गोलको बराबरीमा सकिएको खेलमा उनले खेलको अन्त्यतिर रेफ्री लुकालाई अभद्र व्यवहार देखाएका थिए । पछि उनले टचलाइनमा रहेको बललाई दर्शकदीर्घातर्फ फालेका थिए । त्यसपछि उनलाई रातो कार्ड देखाइएको थियो ।

मौरिन्होलाई उनका सहायकले संयमता अपनाउन प्रयास गरेको थियो । उनले रेफ्रीलाई युभेन्ट्सले पठाएको आरोप लगाएको थियो । ला स्टाम्पाका अनुसार ‘मौरिन्होले रेफ्री लुका पायरेटोलाई चिच्याए । उनहरुले तपाईलाई जानी जानी पठाए , युभेन्ट्सले तपाईलाई पठाए ।’

सिरी ‘ए’ मा ९२ खेलमा रेफ्री गरिसकेका र गत सेप्टेम्वरमा अन्तर्राष्ट्रिय रेफ्रीमा बढुवा भएको पेइरेटोका एक भाई छन् । जसले युभेन्टसका लागि ८ वर्ष काम गरेका थिए ।

यो सिजन सिरी ‘ए’ मा फर्किएका मौरिन्होले रोमाको जिम्मेवारी सम्हाल्दादेखि नै धेरै अनुशासनात्मक समस्या भोगिसकेका छन् । चेल्सी, रियल म्याड्रिड, म्यानचेस्टर युनाइटेड र टोटेनहमका पुर्व प्रशिक्षकलाई यो सिजनको सुरुमा नेपोलीविरुद्धको खेलपछि उनलाई दुई खेलमै प्रतिबन्ध लगाइएको थियो ।

साथै उनले यो सिजनको सुरुमा रियल बेटिससँगको मैत्रीपुर्ण खेलमा पराजय अगावै प्रतिबन्धमा परेका थिए । खेल सुरु हुनु अघि नै उनले रेफ्रीसँग भिड्ने प्रयास गरेका थिए ।