काठमाडौं (हाम्रो खेलकुद) – अखिल नेपाल फुटबल संघ (एन्फा)को निर्वाचनको पूर्व निर्धारित समय प्रभावित भएको छ । एन्फाले फागुन १५ देखि ३० गते भित्र जिल्ला फुटबल संघहरुको निर्वाचन गर्ने पूर्व निर्धारित कार्यक्रमलाई स्थगित गरेको छ ।

एन्फा अध्यक्ष कर्मा छिरिङ शेर्पाको अध्यक्षतामा मंगलबार बसेको कार्यसमितिको १७ औं बैठकले प्राविधिक कारणवश जिल्ला संघको निर्वाचन स्थगित गर्नुपर्ने एन्फा महासचिव इन्द्रमान तुलाधरले जारी गरेको विज्ञप्तीमा उल्लेख गरिएको छ । गत महिना बसेको एन्फा कार्यसमितिको बैठकले जिल्ला संघको निर्वाचन र केन्द्रिय निर्वाचन जेठ १५ गतेका लागि तय गरेको थियो । सोही अनुसार एन्फाले जिल्ला संघलाई निर्देशन पनि दिइसकेको थियो ।

एन्फाको निर्वाचन निर्देशका मस्यौदामा फिफा र एएफसीको केहि संसोधन र निर्देशन आएकोले थप छलफल र शंसोधन गरि अन्तिम रुप दिएपछि मस्यौदा संघको आपकालित बैठकबाट पारित गर्ने पनि मंगलबारको बैठकले निर्णय गरेको छ ।त्यस्तै दुई पटक स्थागित भएको एन्फाको विशेष साधारण सभा निर्वाचन निर्देशकाको पूर्ण मस्र्यादा फिफा र एएफसीबाट अनुमोदन भएपछि एन्फाको आपकालिन बैठकले तय गर्ने निर्णय भएको छ । यसअघि माघ २९ र फागुन ८ का लागि तय भएको एन्फाको विशेष साधारण सभा स्थगित भएको थियो ।