काठमाडौं (हाम्रो खेलकुद) – मिडफिल्डर सन्तोष तामाङले एक गोलसँगै अर्काे गोलको लागि असिस्ट दिएपछि विभागीय आर्मी क्लबले कतार एअरवेज सहिद स्मारक ‘ए’ डिभिजन लिगमा संकटा क्लबमाथि शानदार पूनरागमन जित निकालेको छ ।

आर्मीले संकटालाई ३–१ ले पराजित गरेको हो । एक गोलले पछि परेपछि आर्मीले सुधारिएको खेल पस्कदै संकटालाई लगातार दवावमा राख्दै दोस्रो हाफमा दुई गोल थप्दै जित निकाल्न सफल भएको हो । त्रिपुरेश्वरस्थित दशरथ रंगशालामा मंगलबार भएको खेलमा आर्मीको जितमा सन्तोष तामाङसँगै जर्जप्रिन्स कार्की र टेक बहादुर बुढाथोकीले गोल गरे । संकटाका उत्तम राईको गोल सान्त्वना बन्यो ।

खेलको १५औं मिनेटमा उत्तम राईले गोल गर्दै संकटालाई १–० को अग्रता दिलाए । सुभास गुरुङको कर्नरमा गौतम श्रेष्ठले नभेटेको बललाई उत्तम राई गरेको हेडर गोलरक्षक विश्वास चौधरीको हातमा लाग्दै गोलमा परिणत भएको थियो ।

२७औं मिनेटमा गोलरक्षक विश्वास चौधरीले दोहोरो बचाउ गर्दा सकटा अग्रता दोब्बर पार्नबाट चुक्यो । टिकाराज गुरुङको पेनाल्टी बक्सबाहिरको प्रहारलाई पञ्च गर्दा रिवाउन्डका उत्तम राईको हेडरलाई विश्वासले पञ्च गर्दै बचाए ।

लगत्तै जर्जप्रिन्स कार्कीको पासमा जगजित श्रेष्ठको प्रहारले पोस्टको दिशा लिन सकेन । ३३औं मिनेटमा सन्तोष तामाङको २५ यार्ड टाढाको फ्रिकिकलाई गोलरक्षक रोहित कार्कीले पञ्च गर्दै बाहिर फाल्दा आर्मी बराबरीबाट चुक्यो । ३४औं मिनेटमा सन्तोष तामाङको प्रहार पोस्ट नजिकैबाट बाहिरियो ।

४२औं मिनेटमा जर्जप्रिन्स कार्कीको पासमा सन्तोष तामाङको प्रहार आकासियो । ६०औं मिनेटमा सन्तोष तामाङले गोल गर्दै खेललाई १–१ गोलको बराबरीमा ल्याए । जर्ज प्रिन्स कार्कीको पासमा अनमार्क रहेका सन्तोषले आर्कबाट गरेको प्रहारले जाली चुम्दा गोलरक्षक रोहित कार्कीले बचाउने प्रयास गरेपनि सफल हुन सकेन ।

६९औं टेक बहादुर बुढाथोकीको अवसर पाएपनि सदुपोग गर्न सकेन । ७४औं मिनेटमा जर्ज प्रिन्स कार्कीले दर्शनीय गोल गर्दै आर्मीलाई २–१ को अग्रता दिलाए । सन्तोष तामाङको पासमा जर्जप्रिन्सले अफसाइड बिट ट्याप गर्दै गोलरक्षकलाई बिट गर्दै सुन्दर गोल गर्न सफल भएका थिए ।

८६औं मिनेटमा सक्सिच्युट टेक बहादुर बुढाथोकीले गोल गर्दै आर्मीलाई सानदार जित दिलाए । सन्तोष तामाङको प्रहार डिफ्लेक्ट हुँदा टेकले गोल गर्न सफल भएका थिए । टेक बहादुर ३३औं मिनेटमा गौतम श्रेष्ठको स्थानमा मैदानमा छिरेका थिए ।

यो जितसँगै अपराजित रहेको आर्मी १२ खेलबाट २२ अंक जोडेर दोस्रो स्थानमा उक्लिएको छ । आर्मीले न्युरोड टिम (एनआरटी_ र मनाङलाई पछि पारेको हो । एनआरटी र मनाङको समान २० अंक छ । आर्मीसँग हार भोगेको संकटा १२ खेलबाट १५ अंक जोडेर सातौ स्थानमा यथावत रहेको छ ।

अब आर्मीले लिगको अन्तिम खेलमा मनाङलाई हराउन सके लिगमा दोस्रो स्थान पक्का गर्नेछ । मनाङलाई दोस्रो हुन आर्मीमाथिको जित र एनआरटीले अर्काे खेलमा हार बेहोर्नुपर्नेछ ।