एजेन्सी – खेलको अन्त्यतिर सब्सिच्युट फरवार्ड भिक्टर ओसिमहेनले गोल गरेपछि उपाधि होडमा रहेको नेपोली इटालियन सिरी ‘ए’ मा हारबाट जोगिएको छ ।

नेपोलीले घरेलु टोली क्याग्लिएरीसँग १–१ गोलको बराबरी खेलेको हो । सारडेग्ना एरिना क्याग्लिएरीमा घरेलु टोलीका लागि गास्टन पेरेइरोले गोल गर्दा नेपोलीका भिक्टर ओसिमहेनले बराबरी गोल फर्काएका थिए । दुवै गोल दोस्रो हाफमा भएको थियो ।

प्रतिस्पर्धात्मक बनेको खेलको ५८औं मिनेटमा गास्टन पेरेइरोले गोल गर्दै घरेलु टोलीलाई सुरुवाती अग्रता दिलाए । उनले एलेसान्द्रो डेइओलाको पासमा गोल गर्न सफल भएका थिए । तर, क्याग्लिएरीले त्यो अग्रतालाई जोगाउन सकेन ।

८७औं मिनेटमा सब्सिच्युट फरवार्ड भिक्टर ओसिमहेनले गोल गर्दै नेपोलीलाई हारबाट जोगाए । ६७औं मिनेटमा एन्ड्रिया पेटाग्नाको स्थानमा मैदान छिरेका ओसिमहेनले मारियो रुइको पासमा गोल गर्न सफल भएका थिए ।

यो बराबरीसँगै शीर्षस्थानमा उक्लने मौका गुमाएको नेपोली तेस्रो स्थानमा यथावत रहेको छ । दोस्रो स्थानमा रहेको इन्टर मिलानसँग अंक बराबरी गरेको नेपोली शीर्षस्थानको एसी मिलानसँग २ अंकले पछि छ । इन्टर र नेपोलीको समान ५४ अंक छ ।

सिरी ‘ए’ कै अर्काे खेलमा बोलोग्नाले स्पेजियालाई २–१ ले पराजित गरेको छ । बोलोग्नाको जितमा मार्काे एर्नाउटोभिचले दुवै गोल गरे । स्पेजियाका रे मानाजले सुरुवाती गोल सान्त्वना बन्यो । जितपछि बोलोग्ना २६ खेलबाट ३१ अंक जोडेर १२औं स्थानमा उक्लदा स्पेजिया २६ अंक जोडेर १५औं स्थानमा रहेको छ ।