प्रकाश तिमल्सिना, काठमाडौं

हरेक जितले खुसी नै दिनु पर्छ भन्ने जरुरी नहुने रहेछ । सातदोबाटो युथ क्लबका प्रशिक्षक मेघराज केसीका लागि सोमबार त्यस्तै भयो । सातदोबाटोले सहिद स्मार ए डिभिजन लिगमा सोमबार ब्रिगेड ब्वाइज क्लब (बिबिसी) ३–२ ले हराउँदा पनि केसी खुसी भन्दा बढी भावुक भए । त्यहि खेलको हारसँगै दश वर्षपछि बिबिसीले ए डिभिजन हैसियत गुमायो ।

लिगको १२ औं चरणको खेलको त्यो हारपछि बिबिसी बी डिभिजनमा घटुवा हुने पक्का भएको थियो । खेलको अन्तिम तिर गोल गर्दै सातदोबाटो विजयी भएको थियो । बराबरीमा पनि बिबिसीको रेलिगेसन टर्ने सम्भावना यथावत रहने अवस्था थियो । निर्धारित समय सकिन ३ मिनेट बाँकी रहँदा खेल २–२ को अवस्था थियो । यता टच लाइनमा केसी छटपटाइ रहेका थिए । उनी स्पष्ट जित चाहन्थे ।

आफ्ना गोलकिपर प्रशिक्षक उज्वल मानन्धरसँग लगातार सल्लाह गरिरहेका थिए । ८४ औं मिनेटमा अजयी मार्टिन्सको ठाँउमा केसीले प्रशान्त अवस्थीलाई मैदान पठाए । संयोग ८७ औं मिनेटमा निरज चौधरीले गोल गर्दै टोलीलाई ३–२ ले अग्रता दिलाए । त्यहि गोलले बिबिसीको रेलिगेसन पक्का भयो । बिबिसीमाथि केसीले सहानुभुती राख्न सक्ने अनुमान तत्काल गलत साबित हुन पुग्यो ।

‘जितको भन्दा पनि कुनै टिम हामीसँगको खेलपछि रेलिगेट हुँदा दुःख लागेको छ। अझ त्यसमापनि त्यस्तो टिम रेलिगेट भयो, जसमा म आफैले ए डिभिजनमा ल्याउनका लागि खेलेको थिए’, पोष्ट म्याच कन्फ्रेन्समा उनले भने, ‘कुनै बेला म आफू खेलेको क्लब हो । फुटबलमा व्यवसायिक धर्म निभाउनु पर्छ । हामीले जितका लागि खेल्नुपर्थ्यो । सफलता पनि मिल्यो । तर पनि व्यक्तिगत रुपमा जितमा खुसी हुन सकेको छैन । जितका लागि खेल्नुपर्छ त्यो अलग पाटो हो । यो टिम रेलिगेट भएपनि अरु टिमसँग यो डेटमा भएको राम्रो हुने थियो । अलि खल्लो फिल भइराखेको छ।’

झण्डै डेढ दशक स्थानिय क्लब जावालखेल युथ क्लबबाट ए डिभिजन लिग खेलेका केसीले त्यसपछि प्रशिक्षणमा लागिसकेका थिए । छिमेकी क्लब बिबिसीको अनुरोध अस्वीकार गर्न नसकेर केसी बि डिभिजन लिग खेल्न तयार भए । केसी सम्मलित टोली २०६१ मा ए डिभिजनमा बढुवा भएको थियो । संयोग अहिले केसीले प्रशिक्षण दिइरहेको टोलीसँग खेल्दै बिबिसी ए डिभिजनबाट बिदा भएको छ ।
त्यसको दबाब केसी माथि थियो ।

‘प्रेसर त हुन्छ नि । मैले ए डिभिजन छाडिसकेपछि उहाँहरुको अनुरोध गर्दा धेरै पछि खेले । ए डिभिजनमा पुर्याउन मद्दत पनि गरे’, उनले भने, ‘त्यहि टोलीमाथि जित्दा बी डिभिजन झर्छ भन्न थाहा थियो । कहिले काहिँ केहि गर्न नसकिने हुन्छ । त्यस हिसाबले आफैसँग प्रेसर थियो ।’

अर्को एउटा संयोग पनि केसीले स्मरण गरे । लिग खेल्न छाडिसकेका केसीले २०६३ को लिगमा एक खेल फेरि जावलाखेलबाट खेलेका थिए । ‘जावलाखेलले सुरुको ६ खेलमा बराबरी खेल्यो । दबाबमा थियो’, उनले भने, ‘सबैको सल्लाहमा मैले सातौं खेल खेल्नुपर्ने भयो । मैले सुरुको २ गोल गरे । त्यसपछि चोट लागेर म निस्किए । गौरव थापाले ५ गोल गरेपछि हामी ७–० ले जित्यौं । त्यो जित पछि बिबिसीविरुद्ध नै थियो ।’

ए डिभिजनका थुप्रै क्लबलाई प्रशिक्षक दिइसकेका केसीको सातदोबाटोले यसपटक जाएन्ट किलरको उपनाम पाएको छ । १२ खेलमा टोलीले ५ जित निकालेको छ । त्यसमा बिबिसी अघि सर्वाधिक ८ पटक लिग जितेको मनाङ मस्र्याङ्दी क्लबलाई २–१, केसीको पूर्व क्लब लिगको विजेता रहि सकेको थ्री स्टार, अर्को पूर्व विजेता नेपाल पुलिस क्लबलाई १–० ले र अहिले सुधारिएको प्रदर्शन गरेको एपिएफ फुटबल क्लबलाई ४–२ ले हराएको थियो । त्यसो त प्रशिक्षक केसी मातृशोक परेपछि टचलाइनमा नहुँदा सातदोबाटोको प्रदर्शनमा असर परेको थियो । खेलाडीहरु नै उनको उपस्थितिले मनोबल उच्च हुने बताउँछन् ।

जाएन्ट किलरको नाम बनाइसकेको टोलीले बिबिसीसँग बराबरी वा पराजित हुँदा सबै भन्दा बढी प्रश्न केसीमाथि नै तेर्सिनसक्थ्यो । त्यसमा पनि केसी खरो उत्रेका छन् । तर, पनि बिबिसीसँगको भावनात्मक सम्बन्धका कारण उनी आफै भने जितमा पूरा खुसी हुन सकेनन् । आफैले ए डिभिजनमा उकाल्न भूमिका खेलेका केसीकै टोलीसँगको हारबाट बिबिसी घटुवा भयो । बिबिसीको घटुवा र बढुवा दुवै इतिहासमा केसीलाई स्मरण गरिनेछ ।