एजेन्सी – पोलिस फरवार्ड रोबर्ट लेवान्डोस्कीको दुई गोल सहयोगमा शीर्षस्थानमा रहेको बायर्न म्युनिखले जर्मन बुन्डेसलिगामा सानदार पूनरागमन जित दर्ता गरेको छ ।

घरेलु मैदानमा बायर्नले एक गोलले पछि परेको स्थिति उल्ट्याउँदै पुछारमा रहेको ग्रिउथेर फर्थलाई ४–१ ले पराजित गरेको हो । बायर्नको फराकिलो जितमा लेवान्डोस्कीले दुई गोल गर्दा इरिक म्याक्सिम चुपो मोटिङले एक गोल थपे । एक गोल उपहार पाएको थियो । ग्रिउथेरका ब्रानिमिरको गोल सान्त्वना बन्यो ।

एलिएन्ज एरिनामा आइतबार राति भएको खेलको ४२औं मिनेटमा ब्रानिमिरले फ्रिकिकमा सिधै गोल गर्दै ग्रिउथेरले पहिलो हाफमा १–० ले अघि बढाएका थथिए । तर, घरेलु टोलीले दोस्रो हाफमा उत्कृष्ट प्रदर्शन गर्दै सानदार जित निकाल्न सफल भयो ।

दोस्रो हाफको शुरुमै ४६औं मिनेटमा लेवान्डोस्कीले गोल गर्दै खेललाई १–१ गोलको बराबरीमा ल्याए । उनले इरिक म्याक्सिम चुपो मोटिङको पासमा गोल गर्न सफल भएका थिए । ६१औं मिनेटमा सेवास्टिन ग्रिसविकले आत्मघाती गोल गरेपछि बायर्नले खेलमा २–१ को अग्रता बनायो ।

८२औं मिनेटमा लेवान्डोस्कीले व्यक्तिगत दोस्रो तथा टोलीका लागि तेस्रो गोल गर्दै बायर्नलाई फराकिलो जिततर्फ अघि बढाए । उनले निकलस सुलको पासमा गोल गरेका थिए । यो सिजनको बुन्डेसलिगामा २३ खेलमा उनको यो २८औं गोल हो ।

त्यसपछि इन्ज्युरी समयको थप गरिएको पहिलो मिनेटमा इरिक म्याक्सिम चुपो मोटिङले सर्ज जिनाब्रीको पासमा गोल गर्दै बायर्नको फराकिलो जित पक्का गरे ।

यो जितसँगै शीर्षस्थानमा रहेको बायर्नको २३ खलेबाट ५५ अंक पुगेको छ । बायर्नले दोस्रो स्थानको बोरुसिया डर्टमुन्डलाई ६ अंकले पछि पारेको छ । पारजित ग्रिउथेर २३ खेलबाट १३ अंक जोडेर पुछारमा रहेको छ ।