काठमाडौं (हाम्रो खेलकुद) – मनाङ–मर्स्याङदी क्लबलाई स्तब्ध पार्दै न्युरोड टिम (एनआरटी) कतार एअरवेज सहिद स्मारक ‘ए’ डिभिजन लिगको दोस्रो स्थानमा उक्लिएको छ ।

एनआरटीले मनाङसँगै आर्मी र थ्री स्टारलाई पछि पार्दै दोस्रो स्थानमा उक्लन सफल भएको हो । आइतबार भएको एनआरटीको जितमा मेसुके ओलुमोउले पहिलो हाफमा गरेको गोल नै निर्णायक बन्यो ।

त्रिपुरेश्वरस्थित दशरथ रंगशालामा आइतबार भएको खेलको १५औं मिनेटमा सनम सोडेम्वा लिम्बुको प्रहारलाई गोलरक्षक अशोक बरालले मुस्किलले नियन्त्रणमा लिए ।

२६औं मिनेटमा मेसुके ओलुमोउले गोल गर्दै न्युरोड टिम (एनआरटी) लाई १–० को अग्रता दिलाए । एरिक विष्टको फ्रिकिकलाई मेसुके ओलुमोउले पेनाल्टी बक्समा पाएको अवसरलाई सदुपयोग गर्दा मनाङका गोलरक्षक अशोक बरालले कुनै प्रतिक्रिया नै जनाउन पाएन ।

३४औं मिनेटमा दीपक राईको क्रसमा कप्तान विमल रानाको हेडर पोस्ट नजिकैबाट बाहिरिदा मनाङ बराबरीबाट चुक्यो । ४२औं मिनेटमा दिनेश राजवंशीको क्रसमा विमलकै हेडरलाई गोलरक्ष कपुजन होनाले डाइभ दिदै बचाए । ४५औं मिनेटमा मेसुकेको प्रहार फ्रान्कलिन कोटेटालाई डिफ्लेक्ट हुँदै बाहिरिदा एनआरटी अग्रता दोब्बर पार्नबाट चुक्यो ।

पहिलो हाफको इन्ज्युरी समयको थप गरिएको तेस्रो मिनेटमा एडेलाजा सोमिडेको प्रहार दोस्रो बार च्याप्दै थोै बाहिरिदा मनाङ बराबरीबाट चुक्यो । ५३औं मिनेटमा स्टेफन समिरको पासमा राजेश परियारले वान भर्सेस वानको अवस्थामा गरेको प्रहारलाई गोलरक्षक अशोकले बचाए ।

७४औं मिनेटमा कप्तान दर्शन गुरुङको सशक्त प्रहारलाई गोलरक्षक अशोक बरालले पञ्च गर्दै बचाए । त्यसपछि पनि दुवै टोलीबाट गोलका केही अवसर सिर्जना भएपनि गोल निस्कन नसक्दा खेल एनआरटीले आफ्नो पक्षमा पार्न सफल भयो ।

पहिलो हाफको तुलनामा दोस्रो हाफमा सुधारिएको खेल पस्कनेपनि गोल गर्न नसक्दा मनाङले लिगमा लगातार दोस्रो तथा समग्रमा चौथो हार बेहोर्न पुग्यो । मनाङ यसअघि मछिन्द्र, सातदोबाटो र एपिएफसँग पराजित भएको थियो । एनआरटीले भने पाँचौ जित दर्ता गर्न सफल भयो ।

यो जितसँगै एनआरटीको १२ खेलबाट २० अंक पुगेको छ । समान २० अंक नै रहेपनि मनाङ हेड टु हेडमा तेस्रो स्थानमा झरेको छ । एक खेल कम खेलेको आर्मीको १९ अंक छ । थ्री स्टारको १८ अंक छ ।