एजेन्सी – अन्तिम समयमा मोरोक्कोका मिडफिल्डर हाकिम जियाचको गोलमा लन्डन क्लब चेल्सीले इंग्लिस प्रिमियर लिगमा जित निकालेको छ । चेल्सीले क्रिस्टल प्यालेसलाई उसकै मैदानमा १–० ले हराएको हो ।

सेलह्रस्ट पार्क लन्डनमा शनिबार राति भएको खेलमा जियाचले दोस्रो हाफमा गरेको गोल नै चेल्सीको जितमा निर्णायक बन्यो । उनले ८९औं मिनेटमा गोल गरेका थिए ।

प्रतिस्पर्धात्मक बनेको खेलका चेल्सीले बल पोसेसन राख्दै घरेलु टोलीलाई दवावमा राखेपनि गोलको लागि अन्तिम समय नै पर्खनु परेको थियो । ७५औं मिनेटमा हाकिम जियाचले गोल गरेपनि उनको गोलले मान्यता पाएन । उक्र गोलको मुभमा उनी अफसाइड ठहरिएका थिए ।

तर, जियाचले नै ८९औं मिनेटमा गोल गर्दै चेल्सीलाई महत्वपूर्ण जित दिलाए । यो जितसँगै तेस्रो स्थानमा रहेको चेल्सीको २५ खेलबाट ५० अंक पुगेको छ । चेल्सी शीर्षस्थानको म्यानचेस्टर सिटीसँग १३ अंकले तथा दोस्रो स्थानको लिभरपुलसँग ६ अंकले पछि छ । पराजित क्रिस्टल प्यालेस २६ अंक जोडेर १३औं स्थानमा रहेको छ ।

शनिबारै लिभरपुलले घरेलु मैदानमा पछि परेको स्थिति उल्ट्याउँदै पुछारमा रहेको नर्विच सिटीमाथि ३–१ को पूनरागमन जित निकालेको छ । एनफिल्डमा शनिबार राति भएको खेलमा लिभरपुलको जितमा साडियो माने, मोहम्मद सलाह र लुइस डियाजले गोल गरे । नर्विचका मिलोट रासिकाको गोल सान्त्वना बन्यो ।

यो पूनरागमन जितसँगै लिभरपुलले शीर्षस्थानको म्यानचेस्टर सिटीसँगको अंक दुरी ६ मा छोट्याएको छ । लिभरपुलको २५ खेलबाट ५७ तथा समान खेलबाटै शीर्षस्थानमा रहेको सिटीको ६३ अंक छ । पराजित नर्विच १७ अंक जोडेर पुछारमा रहँदा रेलिगेसन दवाव बढेको छ ।

अन्य नतिजा
वेस्ट ह्यामविरुद्ध न्यूक्यासल (१–१), आर्सनलविरुद्ध ब्रेन्टफर्ड (२–१), एस्टन भिल्लाविरुद्ध वाट्फोर्ड (०–१), ब्राइटनविरुद्ध बर्नले (०–३), साउथह्याम्टनविरुद्ध एभर्टन (२–०)