काठमाडौं (हाम्रो खेलकुद) – कतार एअरवेज सहिद स्मारक ‘ए’ डिभिजन लिग च्याम्पियन बनिसकेको मछिन्द्र फुटबल क्लबले दोस्रो हुने दौडमा रहेको रुस्लान थ्री स्टार क्लबलाई पराजित गरेको छ ।

कप्तान सुजल श्रेष्ठको गोलमा मछिन्द्रले थ्री स्टारलाई १–० ले पराजित गरेको छ । यो जितसँगै च्याम्पियन बनिसकेको मछिन्द्रले यो सिजन अपराजित यात्रा १२औं खेलसम्म राख्न सफल भयो । अब मछिन्द्रले लिगका अन्तिम खेलमा एपिएफलाई जिते या बराबरीमा रोके अपराजित रहँदै च्याम्पियन बने छ ।

त्रिपुरेश्वरस्थित दशरथ रंगशालामा शनिबार भएको खेलको १७औं मिनेटमा राफयल रिमगागाको फ्रिकिक पहिलो बार च्याप्दै थोरै बाहिरियो । १९औं मिनेटमा अन्सुमाना क्रोमाहको पासमा हेमन्त थापामगरको प्रहारलाई गोलरक्षक विशाल श्रेष्ठले डाइभिङ पञ्च दिदै बचाउँदा थ्री स्टार अग्रता लिनबाट चुक्यो ।

२२औं मिनेटमा उत्सव राईको कर्नरमा सोनाम जाङ्पो भुटियाको हेडरलाई गोलरक्षक प्रिसोले बचाए । २३औं मिनेटमा निशान खड्काको ब्याक पासलाई अभिषेक रिजालले भेट्दै गरेको प्रहार गोलरक्षक प्रिसोलाई पनि बिट गर्दै पोस्टटर्फ अघि बढेको बललाई निशानले नै गोललाईनबाट क्लियर गर्दै थ्री स्टारको संकट टारे ।

४४औं मिनेटमा देवेन्द्र तामाङको फ्रिकिकलाई गोलरक्षक प्रिसोले दोस्रो प्रयासमा नियन्त्रणमा लिने क्रममा अभिषेक रिजालले फउल गर्न पुगे । पहिलो हाफको इन्ज्युरी समयको थप गरिएको दोस्रो मिनेटमा बुद्ध राज लिम्वुको पासमा अभिषेक रिजालको वान भर्सेस वानको प्रहारलाई गोलरक्षक प्रिसोले बचाउँदै मछिन्द्रको अग्रता टारे । लगत्तै काउन्टर अट्याकमा सन्जोक राईको प्रहार डिफेन्डर छिरिङ गुरुङलाई लाग्दै फर्कदा थ्री स्टार पनि अग्रता लिनबाट चुक्यो ।

४८औ मिनेटमा पेनाल्टी बक्सबाहिरको हेमन्त थापा मगरको फ्रिकिक सदुपयोग हुन सकेन । ५१औं मिनेटमा अन्सुमाना क्रोमाहको प्रहार दोस्रो बार च्याप्दै थोरै बाहिरिदा थ्री स्टारले अग्रता लिन सकेन । ८९औं मिनेटमा थ्री स्टर अग्रता लिनबाट चुक्यो । सन्जोक राईको पासमा सब्सिच्युट विजय भुजेलले वान भर्सेस वानको अवस्थामा सुवर्ण अवसर पाएपनि उनले प्रहार गर्न नसक्दा देवेन्द्र तामाङलाई लाग्दै बाहिरियो । इ

न्ज्युरी समयको थप गरिएको तेस्रो मिनेटमा सुजलले पेनाल्टीमार्फत गोल गर्दै मछिन्द्रलाई १–० को जित दिलाए । सब्सिच्युट जीवन गुरुले पेनाल्टी बक्समा अभिषेक गुरुङलाई फउल गरेपछि रेफ्रीले पेनाल्टी प्रदान गरेको थियो ।

उक्त निर्णयमा विवादमा उत्रिएपछि रेफ्री प्रकाशनाथ श्रेष्ठले उनलाई रातो बार्ड देखाउँदै मैदान बाहिर पठाएको थियो । त्यसपछि सुजलले गोल गर्दै मछिन्द्रलाई जित दिलाए ।

यो जितसँगै अपराजित रहेको मछिन्द्र १२ खेलबाट ३२ अंक जोडेर शीर्षस्थानमा यथावत रहेको छ । मछिन्द्र दुई खेल अघि नै च्याम्पियन बनिसकेको छ । हारसँगै थ्री स्टारले मनाङ र आर्मीलाई पछि पार्दै दोस्रो स्थानमा उक्लने मौका गुमाएको छ । थ्री स्टार १२ खेलबाट १८ अंक जोडेर तेस्रो स्थानमा यथावत रहेको छ ।