काठमाडौं (हाम्रो खेलकुद)– सहिद स्मारक ए डिभिजन लिग उपाधिको छिनोफानो भइसकेको अवस्थामा अबको चासो भने रेलिगेसनमा पर्ने र उम्कने टोलीमाथि हुनेछ ।

रेलिगेसन दबाबमा रहेको फ्रेन्ड्स क्लब र अंक तालिकाको पुछारमा रहेको च्यासल युथ क्लबबीच खेलबाट लिगको १२ औं चरणको सुरुवात हुँदैछ । दशरथ रंगशालामा यि दुई टोलीबीच शनिबार १ः०० बजे खेल सुरु हुनेछ ।

सबैभन्दा दबाबमा च्यासल रहेको छ । ११ खेलमा टोलीले मात्र ६ अंक जोडेको छ । एउटा मात्र जित निकालेको च्यासलले २ खेलमा बराबरी र बाँकीमा हार बेहोरेको थियो । अन्तिम दुई खेल जित्न सकेको अवस्थामा भने टोलीको रेलिगेसन खतरा टर्न सक्छ । फ्रेन्ड्सको अवस्था च्यासलको भन्दा थोरै मात्र सहज छ । १२ औं स्थानमा रहेको फ्रेन्ड्स र १३ औं स्थानमा रहेको बिग्रड ब्वाइज क्लब (बिबिसी) को समान ७ अंक छ ।च्यासलसँगको खेलका लागि दुई दिनको तयारी राम्रै भएको फ्रेन्ड्सका प्रशिक्षक मृगेन्द्र मिश्रले शुक्रबार प्रि म्याच कन्फ्रेन्समा बताएका छन् ।

‘दुई दिनको तयारी राम्रै भएको छ । रेलिगेसन जोगाउनका लागि च्यासलविरुद्धको खेल महत्वपूर्ण छ । त्यो खेल जित्यौं भने रेलिगेसनबाट जोगिने सम्भावना ८० प्रतिशत हुन्छ । जितको विकल्प छैन । हार्यो भने जोगिन गाह्रो छ,’ उनले भने, ‘त्यो अवस्थामा बेला सातदोबाटो युथ क्लब र थ्री स्टारको प्रदर्शनमा रेलिगेसन पर्ने टोलीको टुंगो लाग्ने अवस्था बन्छ । च्यासलसँग जिते कुरै सक्यो । सातदाबाटो बलियो छ । यसपटक ललितपुरकै दुई टोली रेलिगेसनमा पर्ने सम्भावना देखिएको छ।’

पछिल्ला दुई खेलमा ४ अंक जोड्दै फ्रेन्ड्सले रेलिगेसन खतरालाई केहि कम गराएको थियो । उता च्यासलले भने सोचे जस्तो प्रदर्शन गर्न सकेको छैन । मिश्रले च्यासल पनि जित्ने लक्ष्यका साथ आउने जनाउँदै भने, ‘हामी दुवै टोलीको अवस्था उस्तै छ । त्यसैले आक्रामक खेल हुनेछ । उनीहरुका लागि पनि गर वा मरको अवस्था छ ।’

उनले आफू उपाधि जित्न नभई रेलिगेसनबाट जोगाउने उद्देश्य साथै नै यसपटकको टोली सम्हालेको दोहोराए । पूरा डर छ । लिग सुरु भएदेखि पीडा छ । निन्द्र आउँदैन । टाउकै फुट्ला जस्तो हुन्छ, उनले थपे, ‘आफ्नो खेल खेल्नु पर्छ । बजारको हल्लामा गएर हुन्न। सेभ गर्छु । लिग च्याम्पियनको लागि कोच बनेको होइन । सेभ गर्छु भन्ने लक्ष्य लिएर आएको हु । त्यहि हो मेरो दायित्व ।’

शनिबार हुने अर्को खेलमा लिग च्याम्पियन मछिन्द्र फुटबल क्लबले थ्री स्टार क्लबको सामना गर्नेछ । अपराजित रहँदै लिगको अन्त्य गर्ने लक्ष्यका साथ खेल्ने मछिन्द्रका प्रशिक्षक प्रवेश कटुवालले बताएका छन् । थ्री स्टारका प्रशिक्षक रविन्द्र शिलाकारले पनि आफूहरु पनि जितको लक्ष्यका साथ खेल्ने र जितको सम्भावना रहेको बताए । बुधबार सातदोबाटोलाई १–० ले हराएर मछिन्द्रले २ खेल अगाडि नै लिग जितेको थियो । लिग इतिहासमा उपाधि रक्षा गर्ने मछिन्द्र सातौं क्लब बनेको छ । मछिन्द्रले २०७६ मा पहिलो पटक लिग जितेको थियो ।