भक्तपुर कप फुटबलमा आयोजक विजयी

काठमाडौं (हाम्रो खेलकुद) – भक्तपुर युवा टिम भक्तपुरको आयोजनामा शुक्रबारदेखि सुरु भएको भक्तपुर कप फुटवल प्रतियोगिताको उद्घाटन खेलमा आयोजक भक्तपुर युवा टिम विजयी भएको छ ।

आयोजक टिमले नमस्ते बनेपा फुटबल क्लव बनेपालाई ३–१ ले पराजित गरेको हो । भक्तपुरको जितमा सुरेश खत्रीले दुई तथा विकास लामाले एक गोल गरे ।

१३औं मिनेटमा सुरेशको गोलबाट भक्तपुरले सुरुवाती अग्रता लिएको थियो । विकासले ४२औ मिनेटमा गोल गर्दै अग्रता दोब्बर पारे । लगत्तै बनेपाका अनिल तिमिल्सिनाले गोल फर्काए । ६१औंं मिनेटमा सुरेशले व्यक्तिगत दोस्रो तथा टोलीका लागि तेस्रो गोल गर्दै भक्तपुरको जित पक्का गरे ।

विजयी टिमका सुरेश खत्री म्यान अफ दी म्याच घोषित भए । भक्तपुरकै सुदर्शन श्रेष्ठ राइजिग प्लेयर घोषित भए । दुवै टिमलाई नगदका साथ पुरस्कार प्रदान गरिएको थियो । साथै गोर्खा इको प्यानलका अध्यक्ष विश्वराम कवांले कम्पनीकोतर्फबाट दुवैलाई उपहार प्रदान गरेका थिए ।

प्रतियोगिता अन्तर्गत शनिबार तीन खेलहरु हुने आयोजकले जनाएको छ । प्रतियोगिता फागुन १४ गतेसम्म चल्नेछ । प्रतियोगिताको उदघाटन बागमति प्रदेशका सांसद सुरेन्द्रराज गोसाईले गरेका थिए ।