काठमाडौं (हाम्रो खेलकुद)– राष्ट्रिय फुटबल टोली तथा सहिद स्मारक ए डिभिजन लिग च्याम्पियन मछिन्द्र फुटबल क्लबका मिडफिल्डर विशाल राई शुक्रबार रविना गुरुङसँग वैवाहिक बन्धनमा बाँधिएका छन् ।

झापा अर्जुनधारा ११ का विशाल र इलाम सन्दकपुर ४ मावोकी रविनाबीच झण्डै दुई वर्षदेखि प्रेम सम्बन्धमा रहेका थिए । विशालका अनुसार शुक्रबार राई परम्परा अनुसार र पछि गुरुङ परम्परा अनुसार विवाह हुनेछ ।

यता काठमाडौंको दशरथ रंगशालामा मछिन्द्रले लगातार दोस्रो पटक लिगको उपाधि रक्षा गरेका दिन विशाल भने रविनलाई लिन झापाबाट इलाम पुगेका थिए । झापा फर्कने क्रममा क्लबले उपाधि जितेको जानकारी पाएका विशालले भने, इलामबाट फर्कदै थिए । गाडीमा फर्कदै गर्दा फोन आएपछि थाहा पाए । खुसी लाग्यो ।

विशाल लगातार चौथो पटक लिग च्याम्पियन टोलीको सदस्य बनेका छन् । मछिन्द्रबाट लगातार दुई पटक लिग जित्नुअघि उनले त्यहि सफलता मनाङ मस्र्याङ्दी क्लबबाट पनि प्राप्त गरेका थिए । विशालसँगै सुजल श्रेष्ठ र गोलकिपर विशाल श्रेष्ठ पनि लगातार चौथो पटक लिग च्याम्पियन टोलीको सदस्य बनेका थिए ।

टोलीको अन्तिम खेलका लागि भने आफू काठमाडौं फर्किसक्ने विशालले जानकारी दिए । विशालको विवाहमा सरिक हुन मछिन्द्रका कप्तान सुजलसहित अन्य खेलाडी झापा पुगेका छन् ।