एजेन्सी – स्पेनिस क्लब सेभियाले युरोपा लिगको अनितम ३२ को प्ले अफको पहिलो लेगमा सानदार जित दर्ता गरेको छ । सेभियाले क्रोएसियन क्लब डिनामो जाग्रिवलाई ३–१ ले पराजित गरेको हो ।

घरेलु मैदानमा सेभियाको सहज जितमा इभान राकिटिच, लुकास ओकम्पास र एन्थोनी मार्सियालले गोल गरे । डिनामो जाग्रिवका मिस्लाभ ओर्सिसले एक गोल फर्काए । सबै चार गोल पहिलो हाफमा नै सम्भव भएको थियो ।

रमन सान्चेज पिजुवान स्टेडियममा बिहीबार राति भएको खेलको १३औं मिनेटमा इभान राकिटिचको पेनाल्टी गोलबाट सेभियाले १–० को अग्रता लिन सफल भएको थियो । डोमिनिक लिभाकोभिचले पेनाल्टी बक्समा एलेजान्द्रो गोमेजलाई खराव ट्याकल गरेपछि रेफ्रीले सेभियालाई पेनाल्टी प्रदान गरेको थियो । जसमा राकिटिच चुकेनन् ।

४१औं मिनेटमा मिस्लाभ ओर्सिसले गोल गर्दै खेललाई १–१ गोलको बराबरीमा ल्याए । ४४औं मिनेटमा लुकास ओकम्पासले गोल गर्दै सेभियालाई पुनः २–१ को अग्रता दिलाए । उनले कर्नरबाट आएको बललाई गोलमा परिणत गरेका थिए । पहिलो हाफको इन्ज्युरी समयको थप गरिएको पहिलो मिनेटमा एन्थोनी मार्सियालले गोल गर्दै सेभियालाई पहिलो हाफमा ३–१ ले अघि बढाए । उनले एलेजान्द्रो गोमेजको पासमा गोल गर्न सफल भएका थिए ।

दोस्रो हाफमा दुवै टोलीले गोलको अवसर बनाएपनि गोल निस्कन नसक्दा पहिलो हाफको नतिजा नै सेभियाको जितमा पर्याप्त बन्यो । यो जितसँगै सेभियाले युरोपा लिगको प्रि–क्वाटरफाइनलमा पुग्ने सम्भावना बलियो बनाएको छ ।

दोस्रो लगमा यही नतिजा कायम गरे वा १–० को हारले पनि सेभिया अघिल्लो चरणमा प्रवेश गर्नेछ । यता, डिनामोलाई अघिल्लो चरण प्रवेश गर्न कम्तीमा पनि २–० को जितको खाँचो छ । २–० को जित निकाले डिनामो अवे गोलको आधारमा अघि बढ्नेछ ।

अन्य नतिजा

बार्सिलोनाविरुद्ध नेपोली (१–१), डर्टमुन्डविरुद्ध रेन्जर्स (२–४), एफसी सेरिफविरुद्ध ब्रागा (२–०), जेनिथविरुद्ध रियल बेटिस (२–३), एटलान्टाविरुद्ध ओलम्पियाकोस (२–१), एफसी पोर्टाेविरुद्ध लाजियो (२–१) र आरबी लाइप्जिगविरुद्ध रियल सोसिडाड (२–२)