काठमाडौं (हाम्रो खेलकुद)– खेलाडीहरुको एकजुटताकै कारण मछिन्द्र फुटबल क्लब सहिद स्मारक ए डिभिजन लिगको उपाधि जित्न सफल भएको कप्तान सुजल श्रेष्ठले बताएका छन् ।

दशरथ रंगशालामा बुधबार सातदोबाटो युथ क्लबलाई १–० ले हराएको मछिन्द्र लिगका आफ्ना बाँकी दुई खेल अघि नै उपाधि रक्षा गर्न सफल भएको थियो । ‘लिग जितेका छौं । खुसी छौं । टिमले लिग भर राम्रो खेल्यो । सबैलाई गर्व छ,’ उनले भने, ‘खेलाडी एकजुट छौं । त्यसैका कारण जित्न सफल भएका हौं ।’

मछिन्द्रमा जस्तो एकजुट आफूले अन्य कुनै क्लबमा नदेखेको पनि सुजलले पोष्ट म्याच कन्फ्रेन्समा बताए । उनले थपे, ‘मैले धेरै टिमबाट खेलिसकेको छु । मैले यहाँ जस्तो एकजुटताको महसुस अहिले सम्म गरेको थिएन।’ सुजलले लिग जित्ने मुख्य आधार मनाङ- मर्स्याङ्दी क्लबलाई हराएपछि तय भएको बताए । ‘पहिलो खेल एनआरटीसँग थियो । कठिन रुपमा जित्यो । दोस्रो खेल त्रिभुवन आर्मी फुटबल क्लबसँग बराबरी खेल्यौं,’ उनले भने, ‘मनाडसँगको नतिजाले सबै सिनारियो चेन्ज भयो ।’

लिग अवधिको अनुभवलाई सुजलले यसरी अर्थ लगाए, ओभरअल जर्नी संघर्षपूर्ण तर अविस्मरणीय रह्यो । सुजलसहित विशाल राई र गोलकिपर लगातार चौथो पटक लिग विजेता टोलीको सदस्य बनेका छन् । पछिल्लो दुई पटक मछिन्द्रको टोलीका सदस्य रहेका यि तीन खेलाडीले त्यसअघि दुई पटक लगातार मनाङ च्याम्पियन बनाएका थिए ।

मछिन्द्रमा स्टार खेलाडीहरु भएपनि एकआपसमा कहिल्यै समस्या नभएको पनि सुजलले सुनाए । ‘स्टार खेलाडी भएपनि एकले अर्काको रिस गरेनौं,’ उनले भने, ‘सबैले एकअर्कालाई साथ दिएर खेल्यौं।’ जितसँगै अपराजित रहेको मछिन्द्रको ११ खेलबाट २९ अंक पुगेको छ । मछिन्द्रले ११ खेलमा ९ जित र २ बराबरीको नतिजा निकालेको छ ।

अब मछिन्द्रले १२औं चरणमा थ्री स्टार र अन्तिम खेलमा नेपाल एपिएफ फुटबल क्लबसँग हार बेहोरेपनि दोस्रो स्थानको टोलीले भेट्नेछैन । दोस्रो स्थानको मनाङको २० अंक छ । छैटौ चरणमा उपाधि दाबेदार मनाङलाई हराएपछि मछिन्द्रको उपाधि यात्रा थप सहज बनेको थियो । त्यसपछि मछिन्द्रले सातदोबाटोसहित लगातार छैटौ जित दर्ता गरेको छ ।

मछिन्द्रको च्याम्पियन यात्रा

मछिन्द्रविरुद्ध एनआरटी (२–१)

आर्मीविरुद्ध मछिन्द्र (०–०)

जावलाखेलविरुद्ध मछिन्द्र (०–२)

शेर्पाविरुद्ध मछिन्द्र (०–३)

संकटाविरुद्ध मछिन्द्र (०–०)

मनाङविरुद्ध मछिन्द्र (०–१)

पुलिसविरुद्ध मछिन्द्र (०–१)

मछिन्द्रविरुद्ध फ्रेन्ड्स (१–०)

बिबिसीविरुद्ध मछिन्द्र (०–४)

मछिन्द्रविरुद्ध च्यासल (२–०)

मछिन्द्रविरुद्ध सातदोबाटो (१ –०)