काठमाडौं (हाम्रो खेलकुद) – सुरुवाती अग्रता जोगाउन नसक्दा त्रिभुवन आर्मी फुटबल क्लबले कतार एअरवेज सहिद स्मारक ‘ए’ डिभिजन लिगमा हिमालयन शेर्पा क्लबसँग बराबरीमा रोकिएको छ । १० खेलाडीमा समेटिएको आर्मीले शेर्पासँग १–१ गोलको बराबरी खेलेको हो ।

सातदोबाटोस्थित एन्फा कम्प्लेक्सको मैदानमा बुधबार भएको खेलमा आर्मीका लागि जर्ज प्रिन्स कार्कीले गोल गर्दा शेर्पाका पिस्टोन मुताम्वाले बराबरी गोल फर्काएका थिए ।

२६औं मिनेटमा जर्जप्रिन्सले गोल गर्दै आर्मीलाई अग्रता दिलाएका थिए । उनले टेक बहादुर बुढाथोकीको पासमा गोल गर्न सफल भएका थिए । तर, त्यो अग्रतालाई आर्मीले दोस्रो हाफमा जोगाउन सकेन ।

६५औं मिनेटमा मुताम्वा पिस्टोनले गोल गर्दै खेललाई १–१ गोलको बराबरीमा ल्याए । आशिष गुरुङको पासमा पिस्टोनले मैदानको मध्यभागबाट बल एक्लै अघि बढाउँदै वान भर्सेस वानको स्थितिमा गोल गर्न सफल भएका थिए ।

आर्मीले खेलको अन्तिम समयमा १० खेलाडीमा समेटिएको खेलको अन्त्य गरेको थियो । गोलरक्षक विकेश कुथुले पेनाल्टी बक्सको ठीक बाहिर वान भर्सेस वानको स्थितिमा सुरेश कुमाललाई फउल गरेपछि रेफ्री नविन्द्र महर्जनले विकेशलाई सिर्ध रातो कार्ड देखाउँदै मैदान बाहिर पठाएको थियो । अन्तिम समयमा दीपक गुरुङले आर्मीको पोस्ट सम्हालेका थिए ।

यो बराबरीसँगै आर्मी ११ खेलबाट १९ अंक जोडेर तेस्रो स्थानमै यथावत रहँदा दोस्रो स्थानमा उक्लने मौका गुमाएको छ । शेर्पा ११ खेलबाट १३ अंक जोडेर आठौं स्थानमा रहेको छ ।