काठमाडौं (हाम्रो खेलकुद) – लिग लिडर मछिन्द्र फुटबल क्लब र सातदोबाटो युथ क्लबले कतार एअरवेज सहिद स्मारक ‘ए’ डिभिजन लिगको पहिलो हाफमा बराबरी खेलेका छन् । मछिन्द्र र सातदोबाटोले पहिलो हाफमा गोलरहित बराबरी खेलेको हो ।

त्रिपुरेश्वरस्थित दशरथ रंगशालामा बुधबार भएको प्रतिस्पर्धात्मक खेलमा दुवै टोलीले गोलका केही अवसर सिर्जना गरेपनि गोल गर्न सकिरहेका छैनन् । नवौ मिनेटमा कप्तान मान बहादुर तामाङको फ्रिकिकलाई गोलरक्षक विशाल श्रेष्ठले सहजै नियन्त्रणमा लिए ।

१८औं मिनेटमा कप्तान मानबहादुरको कर्नरमा सुदिप गुरुङको प्रहार फितलो बन्दा गोलरक्षक विशाललाई कुनै गाह्रो भएन । लगत्तै काउन्टरमा विमल घर्तीमगरको प्रहारलाई गोलरक्षक अभिषेक बरालले पञ्च गर्दै बचाउँदा मछिन्द्र अग्रता लिनबाट चुक्यो ।

२२औं मिनेटमा रेजिन धिमालको कर्नरमा सुनिल बलको हेडरलाई गोलरक्षक अभिषेकले बचाउँदा रिवाउन्डको नुर्लान नोभ्रुजोभको हेडरलाई निरज चौधरीले गोललाईनबाट क्लियर गर्दै सातदोबाटोको संकट टारे । लगत्तै २४औं मिनेटमा नुर्लानको क्रसमा विमल घर्तीमगरको हेडरलाई गोलरक्षक अभिषेकले विफल पारे ।

२९औं मिनेटमा आकाश बुढामगरको कर्नरमा निरज चौधरीको प्रहार गोलरक्षक विशालले हुलमुलका बीच नियन्त्रणमा लिए । ३२औं मिनेटमा मानबहादुरको फ्रिकिकमा मार्टिन एडेल्फे सिलो नंगाको हेडरलाई गोलरक्षक विशालले पञ्च गर्दै बचाए ।
यस खेलमा जित निकाल्न सके मछिन्द्र दुई खेल अगावै लिगको च्याम्पियन बन्नेछ । सातदोबाटो मछिन्द्रलाई रोकने योजनामा छ ।