काठमाडौं (हाम्रो खेलकुद) – ३–० ले पछि परेको स्थिति उल्ट्याएर फ्रेन्ड्स क्लबले जावलाखेल युथ क्लबविरुद्ध रोमाञ्चक बराबरी खेलेको छ । फ्रेन्ड्सले जावलाखेलसँग ३–३ गोलको बराबरी खेल्दै अंक खोस्न सफल भएको हो ।

सातदोबाटोस्थित एन्फा कम्प्लेक्सको मैदानमा मंगलबार भएको कतार एअरवेज सहिद स्मारक ‘ए’ डिभिजन लिग अन्तरगतको खेलमा जावलाखेलका लोइक एनजिमीको दुई तथा रुप बहादुर लामाको एक गोल गरे । फ्रेन्ड्सका नाथानिल जुडे गार्सियाले दुई तथा जमोल एन्थोनी फ्रान्कोइसले एक गोल गरे ।

खेलको ११औं मिनेटमा लोइक एनजिमीले गोल गर्दै जावलाखेललाई सुरुवाती अग्रता दिलाएका हुन् । निकोलस फर्नान्डेसको फ्रिकिकमा सुरज ज्यू ठकुरीको प्रहारलाई गोलरक्षक बचाएपनि हुल मुलमा लोइकले गोल गर्न सफल भएका थिए ।

३९औं मिनेटमा लोइक एनजिमीले व्यक्तिगत र टोलीका लागि दोस्रो गोल गर्दै जावलाखेलको अग्रता दोब्बर पारे । उनले यसपटक पनि निकोलस फर्नान्डेसको पासमा गोल गर्न सफल भएका थिए ।

४३औं मिनेटमा रुप बहादुर लामाले गोल गर्दै जावलाखेललाई पहिलो हाफमा ३–० ले अघि बढाए । पहिलो हाफको इन्ज्युरी समयको थप गरिएको तेस्रो मिनेटमा नाथानिल जुडे गार्सियाले गोल गर्दै खेललाई ३–१ को स्थितिमा ल्याए ।

७१औं मिनेटमा नाथानिल जुडे गार्सियाले फ्रिकिकमा सिधै गोल गर्दै खेललाई ३–२ को स्थितिमा ल्याए । इन्ज्युरी समयको थप गरिएको थप गरिएको दोस्रो मिनेटमा जमोल एन्थोनी फ्रान्कोइसले गोल गर्दै फ्रेन्ड्सलाई हारबाट जोगाए ।

यो बराबरीसँगै अंक तालिकामा कुनै परिवर्तन भएको छैन । जावलाखेल ११ खेलबाट १० अंक जोडेर ११औं स्थानमा तथा फ्रेन्ड्स ७ अंक जोडेर १२औं स्थानमा यथावत रहेको छ ।