काठमाडौं (हाम्रो खेलकुद) – जावलाखेल युथ क्लबले कतार एअरवेज सहिद स्मारक ‘ए’ डिभिजन लिग अन्तरगतको खेलमा फ्रेन्ड्स क्लबविरुद्ध पहिलो हाफमा ३–१ को अग्रता लिएको छ ।

लोइक एनजिमीको दुई दुई तथा रुप बहादुर लामाको एक गोलमा जावलाखेलले पहिलो हाफमा ३–१ को अग्रता लिन सफल भएको हो । नाथानिल जुडे गार्सियाले एक गोल फर्काएका छन् । सातदोबाटोस्थित एन्फा कम्प्लेक्सको मैदानमा मंगलबार भएको खेलको ११औं मिनेटमा लोइक एनजिमीले गोल गर्दै जावलाखेललाई सुरुवाती अग्रता दिलाए।

निकोलस फर्नान्डेसको फ्रिकिकमा सुरज ज्यू ठकुरीको प्रहारलाई गोलरक्षक बचाएपनि हुल मुलमा लोइकले गोल गर्न सफल भएका थिए । ३९औं मिनेटमा लोइक एनजिमीले व्यक्तिगत र टोलीका लागि दोस्रो गोल गर्दै जावलाखेलको अग्रता दोब्बर पारे । उनले यसपटक पनि निकोलस फर्नान्डेसको पासमा गोल गर्न सफल भएका थिए ।

४३औं मिनेटमा रुप बहादुर लामाले गोल गर्दै जावलाखेललाई पहिलो हाफमा ३–० को अग्रता दिलाए । पहिलो हाफको इन्ज्युरी समयको थप गरिएको तेस्रो मिनेटमा नाथानिल जुडे गार्सियाले गोल गर्दै खेललाई ३–१ को स्थितिमा ल्याए ।

फ्रेन्ड्सलाई हराउन सके जावलाखेलको रेलिगेसन चुनौती सकिनेछ । ६ अंक जोडेको फ्रेन्ड्सले ९ अंकसाथ ११ औं स्थानमा रहेको जावलाखेललाई हराए दुवै टोलीले स्थान बदल्नेछन् । यससँगै फ्रेन्ड्सको रेलिगेसन बच्ने सम्भावना पनि हुनेछ ।