काठमाडौं (हाम्रो खेलकुद) – कतार एअरवेज सहिद स्मारक ए डिभिजन लिग अन्तर्गत एघारौं चरणको खेलमा आज दुई रेलिगेसन भिडन्तका खेल हुँदैछन् । दुवै खेल एकै समयमा हुने कारणले पनि प्रतिस्पर्धा थप रोमान्चक हुने अपेक्षा गरिएको छ । रेलिगेसन क्षेत्रमा संघर्ष गरिरहेका कारण यी दुवै खेल ‘६-पोइन्टर’ हुनेछन् ।

अंक तालिकाको पुछारमा रहेका ४ टोलीबीच प्रतिस्पर्धा हुँदा सबै टोलीसँग रेलिगेसन क्षेत्र छाड्ने समिकरण छ । अझ जावलाखेलसँग त रेलिगेसनको डर पूर्ण रुपले समाप्त पार्ने अवसर पनि छ । यता च्यासल अंक तालिकाको पुछारमा रहेकाले बढी दबाबमा देखिन्छ ।

एन्फा कम्प्लेक्समा दिउँसो १ बजे फ्रेन्ड्स क्लब र जावलाखेल युवा क्लब भिड्दैछन् । ६ अंक जोडेको फ्रेन्ड्सले ९ अंकसाथ ११ औं स्थानमा रहेको जावलाखेललाई हराए दुवै टोलीले स्थान बदल्नेछन् । यससँगै फ्रेन्ड्सको रेलिगेसन बच्ने सम्भावना पनि हुनेछ । पछिल्लो खेलमा लिगको पहिलो जित दर्ता गरेको फ्रेन्ड्स उच्च मनोबलका साथ खेल्नेछ । जावलाखेल पनि स्तर अनुसार प्रदर्शन गर्दै नवौं स्थानमा उक्लने सुरमा हुनेछ ।

दिउँसो १ बजे नै दशरथ रंगशालामा ब्रिगेड ब्वाइज क्लब र च्यासल युवा क्लवबीच प्रतिस्पर्धा हुनेछ । पछिल्लो ५ खेलमा जम्मा १ अंक जोडेका दुवै टोली जितसहित रेलिगेसन जोन छाड्न चाहन्छन् । तर यसका लागि फ्रेन्ड्सको नतिजाले पनि प्रभाव पार्नेछ । अंक बराबरी भए हेड टु हेड नतिजाले पनि स्थान निर्क्यौल गर्ने भएकाले दुवै टोली यो खेल जित्दै रेलिगेसनको डर कम गर्ने प्रयासमा हुनेछन् ।

आजको खेलमा जावलाखेलले जित हासिल गरे फ्रेन्ड्स पुन: रेलिगेसन क्षेत्रमा खस्नेछ । बिबिसी र च्यासलले बराबरी खेलेमा त्यसले फ्रेन्ड्सलाई फाइदा पुग्ने देखिन्छ । लिगको ११ औं चरणमा फ्रेन्ड्स र च्यासल खेल्ने हुनाले पनि यो दुई खेल जित्ने टोलीले रेलिगेसन टार्ने समिकरण बनेको छ ।

बिबिसीले अन्तिम दुई खेलमा सातदोबाटो र थ्री स्टारको सामना गर्ने हुनाले अब क्लबले रेलिगेसन टार्न आजको खेल जित्नुको विकल्प छैन । च्यासलले यसपछि फ्रेन्ड्स र अन्तिम खेलमा सातदोबाटोको सामना गर्नेछ । फ्रेन्ड्सले भने यसपछि च्यासल र अन्तिम खेलमा हिमालयन शेर्पाको सामना गर्नेछ ।

अंक तालिका:

लिगको सम्पूर्ण जानकारी यहाँ लिनुहोस्