एजेन्सी – नेपाली राष्ट्रिय टोलीका मिडफिल्डर रोहित चन्द सम्मिलित पर्सिजा जाकार्ताले इन्डोनेसिया लिग वानमा रोमाञ्चक बराबरी खेलेको छ । १० खेलाडीमा समेटिएको पर्सिजाले घरेलु पर्सिवाय सुरावायसँग ३–३ गोलको बराबरी खेल्दै अंक खोस्न सफल भएको हो ।

पर्सिजाले सुरुवाती अग्रता लिनका बावजुत ३–१ ले पछि परेको अवस्थाबाट खेललाई बराबरीमा ल्याउन सफल भएको हो । पर्सिवाय सुरावायका टेइसेइ मारुकावा, रिक्की काम्वुएया र साम्सुल एरिफ मुनिपले गोल गर्दा पर्सिजाका मकान कोनाटेले दुई तथा मार्काे सिमिकले एक गोल गरे । खेलको दोस्रो मिनेटमा नै मार्काे सिमिकको गोलबाट पर्सिजाले सुरुवाती अग्रता लिएको थियो ।

१५औं मिनेटमा टेइसेइ मारुकावाले पेनाल्टीमा गोल गर्दै खेललाई १–१ गोलको बराबरीमा ल्याए । ४८औं मिनेटमा रिक्की काम्वुएयाले गोल गर्दै घरेलु टोलीलाई २–१ ले अघि बढाए । ६५औं मिनेटमा रियुजी युटोमो सिधै रातो कार्ड खाँदै मैदानबाट बाहिरिएपछि खेलमा पछि परेको पर्सिजा थप समस्यामा परेको थियो ।

८४औं मिनेटमा सामसुल एरिफ मुनिपले गोल गरेपछि पर्सिजा खेलमा ३–१ ले पछि परेको थियो । तर, त्यसपछि पर्सिजाले उत्कृष्ट प्रदर्शन गर्दै खेललाई बराबरीमा ल्याउन सफल भए । ८७औं मिनेटमा मकान कोनाटेले गोल गर्दै पर्सिजाको आशा देखाए । इन्ज्युरी समयको थप गरिएको छैटौं मिनेटमा मकान कोनाटेले पेनाल्टीमा गोल गर्दै पर्सिजालाई हारबाट जोगाए ।

बराबरीसँगै पर्सिवाय सुरावाय २५ खेलबाट ४५ अंक जोडेर पाँचौ स्थानमा रहेको छ । पर्सिजा २४ खेलबाट ३४ अंक जोडेर सातौं स्थानमा रहेको छ ।