एजेन्सी – इटालियन सिरी ‘ए’ को शीर्ष चारको दौडमा रहेको युभेन्ट्स र एटलान्टाले बराबरी खेल्दै अंक बाँडेका छन् । एटलान्टा र युभेन्ट्सले १–१ गोलको बराबरी खेलेको हो ।

अन्तिम समयमा सम्हालिन नसक्दा घरेलु टोली एटलान्टाले युभेन्ट्ससँग अंक बाड्न बाध्य बन्यो । घरेलु टोलीका रुस्लान मालिनोभ्स्कीले गोल गर्दा युभेन्ट्सका डानिलोले बराबरी गोल फर्काए । जिविस स्टेडियम बरगामोमा आइतबार राति भएको प्रतिस्पर्धात्मक खेलको दुवै गोल दोस्रो हाफमा भएको थियो ।

७६औं मिनेटमा रुस्लान मालिनोभ्स्कीले गोल गर्दै घरेलु टोलीलाई १–० को अग्रता दिलाए । उनले रेमो फ्रेउलेरको पासमा गोल गर्न सफल भए । इन्ज्युरी समयको थप गरिएको दोस्रो मिनेटमा डानिलोले गोल गर्दै युभेन्ट्सलाई हारबाट जोगाए । उनले पाउलो डिबालाको पासमा गोल गर्न सफल भएका थिए ।

बराबरीसँगै युभेन्ट्स २५ खेलबाट ४६ अंक जोडेर चौथो स्थानमा यथावत रहेको छ । एक खेल कम खेलेको एटलान्टा ४४ अंक जोडेर पाँचौ स्थानमा रहेको छ ।

सिरी ‘ए’ कै अर्काे खेलमा सस्सुलो र रोमाले २–२ गोलको बराबरी खेल्दै अंक बाँडेका छन् । रोमाका ट्याम्मी अब्राहम र ब्रायन क्रिस्टान्टेले गोल गर्दा सस्सुलोका हामेद ट्राओरेले गोल गर्दा एक गोल उपहार पाएको थियो । जियान मार्काे फेरारी दोहोरो पहेलो कार्ड खाँदै मैदानबाट बाहिरिएपछि सस्सुलो १० खेलाडीमा समेटिएको थियो ।

बराबरीसँगै रोमा २५ खेलबाट ४० अंक जोडेर सातौ स्थानमा रहेको छ । सस्सुलो ३० अंक जोडेर १२औं स्थानमा रहेको छ ।