एजेन्सी – ब्राजिली सेन्ट्रल मिडफिल्डर फाविन्होको गोलमा मर्सिसाइड क्लब लिभरपुलले इंग्लिस प्रिमियर लिगमा जित निकालेको छ । लिभरपुलले रेलिगेसन क्षेत्रको पुछारमा रहेको बर्नलेलाई उसकै मैदानमा १–० ले पराजित गरेको हो ।

ट्रफ मुर बर्नलेमा आइतबार राति भएको खेलमा फाविन्होले पहिलो हाफमा गरेको गोल नै लिभरपुलको जितमा निर्णायक बन्यो । उनले ४०औं मिनेटमा गोल गर्न सफल भएका थिए ।

खेलको सुरुवातदेखि नै घरेलु टोलीलाई दवावमा राखेको लिभरपुलले गोलको लागि ४०औं मिनेटमा कुर्नुपरेको थियो । एलेक्सान्डर आर्नाेल्डको कर्नरमा फाविन्होले गोल गर्न सफल भएका थिए । त्यसपछि थप गोल निस्कन नसक्दा लिभरपुल विजयी हुन सफल भयो ।

अफ्रिका कप अफ नेसन्सपछि स्टार फरवार्डद्धय मोहम्मद सलाह र साडियो मानेले लिभरपुलको पहिलो रोजाईमै खेलेपनि सोचेअनुरुपको प्रदर्शन गर्न सकेनन् ।

जितसँगै लिभरपुलले शीर्षस्थानको म्यानेचस्टर सिटीसँगको अंक दुरी ९ मा छोट्याएको छ । दोस्रो स्थानमा रहेको लिभरपुलको २४ खेलबाट ५४ अंक पुगेको छ । एक खेल बढी खेलेको सिटीको ६३ अंक छ । पराजित बर्नले २१ खेलबाट १४ अंक जोडेर पुछारमा रहेको छ ।

अर्काे खेलमा टोटेनहम हटस्पर घरेलु मैदानमा वल्भ्ससँग २–० ले स्तब्ध बनेको छ । टोटेनहमलाई स्तब्ध पार्न वल्भ्सका राहुल जिमिनेज र लिएन्डर डेन्डनकरले गोल गरे । दुवै गोल पहिलो हाफमा भएको थियो । टोटेनहमले लगातार दोस्रो हार बेहोरेको हो । यसअघि टोटेनहमले घरेलु मैदानमै साउथह्याम्टनसँग ३–२ ले पराजित भएको थियो ।

यो जितसँगै वल्भ्स २३ खेलबाट ३७ अंक जोडेर सातौ स्थानमा उक्लिएको छ । पराजित टोटेनहम २२ खेलबाट ३६ अंक जोडेर आठौं स्थानमा रहेको छ ।