काठमाडौं (हाम्रो खेलकुद) – न्युरोड टिम (एनआरटी) र हिमालयन शेर्पा क्लबले कतार एअरवेज सहिद स्मारक ‘ए’ डिभिजन लिगमा बराबरी खेलेका छन् । एनआरटी र शेर्पाले गोलरहित बराबरी खेल्दै अंक बाँडेको हो ।

त्रिपुरेश्वरस्थित दशरथ रंगशालामा आइतबार भएको फितलो र निराशजनक खेलमा दुवै टोलीले पोस्टमा उल्लेख्य मुभ बनाउन सकेनन् । खेलको १९औं मिनेटमा सनम लिम्वुको क्रसमा स्टेफन समिरले पेनाल्टी बक्समा सुवर्ण अवसर पाएपनि नियन्त्रणमा लिन नसक्दा शेर्पाका गोलरक्षक दीप कार्कीले सहजै बचाए ।

२५औं मिनेटमा कप्तान विश्वास श्रेष्ठको २० यार्ड टाढाको फ्रिकिकलाई एनआरटीका गोलरक्षक अजित प्रजापतिले पञ्च गर्दै बचाए । ३१औं मिनेटमा कप्तान विश्वास श्रेष्ठको प्रहार दोस्रो बार च्याप्दै थोरै बाहिरियो । सरोज तामाङले क्लियर गर्न ढिला गर्दा विश्वासले सुवर्ण अवसर पाएका थिए ।

पहिलो हाफको इनयुरी समयको थप गरिएको पहिलो मिनेटमा कप्तान विश्वासको उत्कृष्ट पासमा विसन गुरुङले भेट्नुअघि नै गोलरक्षक अजितले डाइभ दिदै बचाएर एनआरटीको खतरा टारे ।

५३औं मिनेटमा आशिष गुरुङको प्रहारलाई गोलरक्षक अजितले पञ्च गर्दै बाहिर फाल्दा शेर्पा अग्रता लिनबाट चुक्यो । इन्ज्युरी समयको थप गरिएको तेस्रो मिनेटमा त्रिदेव गुरुङको प्रहारलाई गोलरक्षक अजितले पञ्च गर्दै बचाउँदा जितबाट वञ्चित बन्यो ।

बराबरीपछि एनआरटी १० खेलबाट १४ अंक जोडेर सातौ तथा १२ अंकसहित शेर्पा आठौं स्थानमा यथावत रहेको छ । एनआरटीले संकटासँग अक बराबरी गरेपनि गोल अन्तरमा पछि छ ।