एजेन्सी – १० खेलाडीमा समेटिएको एट्लेटिको म्याड्रिडले रोमाञ्चक जित निकाल्दा शीर्षस्थानमा रहेको रियल म्याड्रिड बराबरीमा रोकिएको छ । एट्लेटिकोले घरेलु मैदानमा गेटाफेमाथि ४–३ को रोमाञ्चक जित निकालेको हो ।

एक समय २–० को अग्रता लिएको एट्लेटिको ३–२ ले पछि परेको अवस्थाबाट दुई गोल थप्दै रोमाञ्चक जित निकाल्न सफल भएको हो ।एट्लेटिकोको रोमाञ्चक जितमा एन्जल कोरेआले दुई तथा म्याथिअस कुन्हा र मारियो हर्माेसोले गोल गरे । गेटाफेका इनेस युनालले दुई तथा बोर्जा मायोरलले एक गोल गरे ।

स्टेडियो वान्डा मेट्रोपोलिटानोमा शनिबार राति भएको खेलमा लुइस सुआरेज पेनाल्टीमा चुक्दा एट्लेटिको अग्रता लिनबाट चुक्यो । १९औं मिनेटमा एन्जल कोरेआले गोल गर्दै एट्लेटिकोलाई सुरुवाती अग्रता दिलाए । २७औं मिनेटमा म्याथिअस कुन्हाले गोल गर्दै एट्लेटिकोको अग्रता दोब्बर पारे ।

३०औं मिनेटमा बोर्जा मायोरलले गोल गर्दै खेललाई २–१ को अवस्थामा ल्याए । ३७औं मिनेटमा इनेस युनालले पेनाल्टीमा गोल गर्दै खेललाई २–२ गोलको बराबरीमा ल्याए । ४२औं मिनेटमा इनेस युनालले व्यक्तिगत दोस्रो तथा टोलीका लागि तेस्रो गोल गरेपछि एट्लेटिको खेलमा ३–२ ले पछि पर्यो ।

पहिलो हाफको इन्ज्युरी समयको थप गरिएको चौथो मिनेटमा एन्जल कोरेआले व्यक्तिगत दोस्रो तथा टोलीको लागि तेस्रो गोल गर्दै खेललाई ३–३ गोलको बराबरीमा ल्याए । ५८औं मिनेटमा एट्लेटिको १० खेलाडीमा समेटिन पुग्यो । मोउरो एरामवारीमाथि अनावश्यक फउल गरेपछि फिलिपे सिधै रातो कार्ड खाँदै मैदानबाट बाहिरिदा टोलीलाई दवाव बढेको थियो ।

तर, निर्धारित समयको खेल सकिन एक मिनेट बाँकी रहँदा मारियो हर्माेसोले गोल गर्दै एट्लेटिकोलाई रोमाञ्चक जित दिलाए । जितसँगै एट्लेटिको २३ खेलबाट ३९ अंक जोडेर शीर्ष चारमा उक्लिएको छ । पराजित गेटाफे २५ अंक जोडेर १५औं स्थानमा छ ।

अर्काे खेलमा शीर्षस्थानमा रहेको रिलय म्याड्रिड घरेलु टोली ग्रानडासँग गोलरहित बराबरीमा रोकिएको छ । दुवै टोलीले गोलका केही सुवर्ण अवस खेर फालेका थिए । खेलको अन्तिम समयमा लुका जोभिकको प्रहार क्रसबारमा लागेर फर्कदा र रिवाउन्डका नाचो फर्नान्डेसको प्रहार सर्जी औरिएरले गोललाइनबाट बचाउँदा रियल जितबाट वञ्चित बन्यो ।

यो बराबरीसँगै रियलले शीर्षस्थानमा आफ्नो अग्रतालाई थप मजवुत बनाउने मौका गुमाएको छ । रियलको २४ खेलबाट ५४ अंक छ । रियलले दोस्रो स्थानको सेभियालाई ४ अंकले पछि पारेको छ । भिल्लारियल ३६ अंक जोडेर छैटौं स्थानमा रहेको छ ।