काठमाडौं (हाम्रो खेलकुद)– टाउकोमा चोट लागेर उपचार गराइरहेका मछिन्द्र फुटबल क्लबका मिडफिल्डर मनिष डाँगी खतरा मुक्त रहेको ब्लु क्रस अस्पतालले जनाएको छ । सहिद स्मारक ए डिभिजन लिगमा शनिबार च्यासल युथ क्लबविरुद्धको खेलमा टाउकोमा चोट लागेपछि मनिषलाई थप उचारका लागि दशरथ रंगशाला नजिकको ब्लु क्रस लगिएको थियो ।

ब्लु क्रसले शनिबार दिउँसो ३ः४५ विज्ञप्ती जारी गर्दै मनिषको आकष्मिक कक्षमा उपचार भइरहेको जनाएको छ । ‘च्यासलविरुद्धको खेलमा मनिषको टाउकोमा चोट लागेको थियो । अहिले उनको अवस्था सामान्य र स्थिर रहेको छ । थप जानकारी पछि दिइने छ । उनी खतरा मुक्त रहेका छन्,’ विज्ञप्तीमा भनिएको छ ।

६१ औं मिनेटमा सुनिल बलको ठाँउमा मैदान प्रवेश गरेको ४ मिनेट पछि नै मनिष घाइते भएका थिए । बल नियन्त्रणमा लिने प्रयासमा विपक्षी खेलाडी यान्निक केट्चासँग ठोक्किदा मनिष टाउकोमा चोट लागेर मैदानमा ढलेका थिए । केहि समय मैदानमा अचेत भएर ढलेका मनिषलाई थप उचारका ब्लुक्रस अस्पताल लगिएको थियो ।

मछिन्द्र फरवार्ड विमल घर्तीमगरले म्यान अफ दी म्याच घाइते सहकर्मी मनिष डाँगीलाई समर्पण गरेका थिए । खेलपछि विमलले मनीष घाइते भएकोमा दुःख व्यक्त गरेका थिए । ‘ जुन घटना घट्यो भयो । त्यसले के बोलु के नबोलु जस्तो भएको छ । खेल जित्दा खुसी पनि छु । अर्कोतर्फ मनिष चोटग्रस्त भए त्यसमा भने दुःखी छु, उनले भने,‘ मछिन्द्रको मात्र होइन मनिष देशको उदाउँदा खेलाडी घाइते भएका छन् । अहिले ठिकै छ भन्ने सुनेको छु । मनिष भाई लाई गेट वेल सुन भन्न चाहन्छु । र यो अवार्ड डेडिकेट पनि भाईलाई नै गर्न चाहन्छु ।’

मछिन्द्रले च्यासललाई २–० ले पराजित गर्दै लिगको १०औं खेलसम्म अपराजित रहन सफल भएको छ । मछिन्द्रको जितमा अर्को गोल सुनिल बलले गरेका थिए । यो जितसँगै मछिन्द्रको उपाधि होड थप मजवुत बनेको छ । जितसँगै अपराजित रहेको मछिन्द्रको १० खेलबाट २६ अंक पुगेको छ । मछिन्द्रसँगको हारसँगै च्यासललाई रेलिगेसनको थप दबाव बढेको छ । च्यासलको १० खेलबाट ५ अंक जोडेर पुछारमा छ ।