काठमाडौं हाम्रो खेलकुद) – राष्ट्रिय टोलीका फरवार्ड विमल घर्तीमगर र मिडफिल्डर सुनिल बलको गोलमा लिग लिडर मछिन्द्र फुटबल क्लबले कतार एअरवेज सहिद स्मारक ‘ए’ डिभिजन लिगमा अपराजित यात्रा कायमै राख्दा च्यासल युथ क्लबविरुद्ध सहज जित निकालेको छ ।

मछिन्द्रले च्यासललाई २–० ले पराजित गर्दै लिगको १०औं खेलसम्म अपराजित रहन सफल भएको हो । दुवै गोल पहिलो हाफमा भएको थियो ।त्रिपुरेश्वस्थित दथरथ रंशालामा शनिबार भएको खेलको चौथो मिनेटमा विशाल राईको फ्रिकिकलाई गोलरक्षक अर्पण कार्कीले पञ्च गर्दै बचाए ।

नवौ मिनेटमा अजित गुरुङको पेनाल्टी बक्सबाहिरको प्रहारलाई विशाल श्रेष्ठले मुस्किलले नियन्त्रणमा लिदा च्यासल अग्रता लिनबाट चुक्यो । नवौं मिनेटमै बल क्लियर गर्ने क्रममा बिमल घर्तीमगरसँग ठोक्किन पुग्दा गोलरक्षक अर्पण घाइते हुन पुग्दा खेल ८ मिनेट रोकिएको थियो । पछि उनी खेल्न नसक्ने भएपछि अर्का गोलरक्षक प्रदिप भण्डारी १७औं मिनेटमा मैदान छिरेका थिए ।

१७औं मिनेटमा बिमल घर्तीमगरले गोल गर्दै मछिन्द्रलाई १–० को अग्रता दिलाए । रेजिन धिमालको कर्नरमा बिमलले हेड पोलमा लाग्दै गोलमा परिण हुदा भर्खरै मैदान छिरेका गोलरक्षक प्रदिपले रोक्ने कुनै मौका नै पाएन । जारी लिगमा विमलको यो चौथो गोल हो ।

३५औं मिनेटमा सुनिल बलले गोल गर्दै मछिन्द्रको अग्रता दोब्बर पारे । उनले विमलको पासमा सुन्दर फिनिस गरेका थिए । जारी लिगमा सुनिलको यो छैटौं गोल हो । ३९औं मिनेटमा मौसा एवागनाको प्रहारलाई डाइभ दिदै बचाउँदा च्यासल अग्रता कम गर्नबाट चुक्यो ।

सुरुवाती ह्वीसिल बज्नुअघि कमल श्रेष्ठले आफ्नो जर्सी नम्वरविनै अर्काे नम्वरमा मैदान उत्रिएपछि खेल सुचारु हुन केही ढिला भएको थियो । खेल केही वेर ढिला सुरु भएपनि रेफ्रीको निर्णयपछि खेल सुचारु गरिदा च्यासलले १० खेलाडीमा रहेर खेलको सुरुवात गरेको थियो । च्यासलले सुरुवाती पाँच मिनेट १० खेलाडीमा खेल्नुपरेको थियो । त्यसपछि उनको स्थानमा सागर थापालाई मैदानमा प्रवेश गराइएको थियो ।

५१औं मिनेटमा गोलरक्षक प्रदीप अघि बढेको अवस्थामा विमल घर्तीमगरको चिप प्रहार पोलमा लाग्दै फर्कदा मछिन्द्रको थप अग्रता बढेन । ६५औं मिनेटमा विशाल श्रेष्ठले रिलिज गरेको बल खोस्ने क्रममा च्यासलका यान्निक केट्चासँग जुध्दै मैदानमै ढल्न पुगेपछि खेल ९ मिनेट रोकिएको थियो ।

मैदानमै सामान्य उपचारपछि उनलाई थप उपचारको लागि एम्बुलेन्समा अस्पताल लगिएको छ । मनिष ६१औं मिनेटमा सुनिल बलको स्थानमा मैदान प्रवेश गरेका थिए ।

७६औं मिनेटमा विमलको पासमा विशाल राईको वान भर्सेस वानको प्रहारले गोलरक्षक प्रदीपलाई बिट गरेपनि यान्निक केट्चाले गोललाइनबाट हेडमार्फत बल जोगाउदै च्यासलको संकट टारे ।

यो जितसँगै मछिन्द्रको उपाधि होड थप मजवुत बनेको छ । जितसँगै अपराजित रहेको मछिन्द्रको १० खेलबाट २६ अंक पुगेको छ । मछन्द्रसँगको हारसँगै च्यासललाई रेलिगेसनको थप दवाव बढेको छ । च्यासलको १० खेलबाट ५ अंक जोडेर पुछारमा छ ।