काठमाडौं (हाम्रो खेलकुद) – कतार एअरवेज सहिद स्मारक ‘ए’ डिभिजन लिगमा रेलिगेसन जोनमा संघर्ष गरिरहेको फ्रेन्ड्स क्लबले ब्रिगेड ब्वाइज क्लब (बीबीसी) विरुद्ध पहिलो हाफमा अग्रता लिएको छ ।

फ्रेन्ड्सले रेलिगेसनकै डरमा रहेको बीबीसीविरुद्ध पहिलो हाफमा ३–१ को अग्रता लिन सफल भएको हो । त्रिपुरेश्वरस्थित दशरथ रंगशालामा शुक्रबार भएको खेलमा फ्रेन्ड्सका सुशिल शाह, श्यामबाबु क्याप्छकी र जमोल एन्थोनी पउलले गोल गरे । बीबीसीका ड्यानी जुनियर वाम्वाले एक गोल फर्काए ।

खेलको १४औं मिनेटमा सुशिल शाहले फ्रिकिकमार्फत दर्शनीय गोल गर्दै फ्रेन्ड्सलाई १–० को अग्रता दिलाए । ड्याडी जुनियर वाम्वाले कपतान नाथानिल जुडे गार्सियालाई फउल गरेपछि प्राप्त फ्रिकिकमा फ्रेन्ड्सका लागि पहिलो खेल खेलिरहेका सुशिलले झन्डै ३० यार्ड टाढाबाट गरेको प्रहार पहिलो बार च्याप्दै दर्शनीय गोल गर्न सफल भएका थिए ।

२५औं मिनेटमा ड्याडी जुनियर वाम्वाले फ्रिकिकमै गोल गर्दै खेललाई १–१ गोलको बराबरीमा ल्याए । असिम भुसालले भुवन बस्नेतलाई फउल गरेपछि आर्कबाहिर प्राप्त फ्रिकिमा ड्यानीले बार चइाप्दै गरेको प्रहारलाइ फ्रेन्ड्सका गोलरक्षक राहुल रामचन्द्र यादवले बचाउने प्रयास गरेपनि जोगाउन सकेन ।

२७औं मिनेटमा श्यामबाबु क्याप्छकीले गोल गर्दै फ्रेन्ड्सलाई २–१ को अग्रता दिलाए । रन्दिप पौडेलले नाथानिल जुडे गार्सियामाथि फउल गरेपनि रेफ्रीले फ्रेन्ड्सलाई एडभान्टेज खेलाउँदा विकास थापा, जमोल एन्थोनी पउल र श्याम बाबुको समन्वयमा गोल गर्न सफल भएका थिए ।

उक्त गोलमा विवादमा उत्रिएपछि रेफ्री प्रज्वल क्षेत्रीले ३०औं मिनेटमा वैकल्पिक खेलाडी रजत तिवारीलाई सिधै रातो कार्ड तथा गोलरक्षक र सहायक प्रशिक्षकलाई पहेलो कार्ड देखाइएको थियो ।

पहिलो हाफको इन्ज्युरी समयको थप गरिएको दोस्रो मिनेटमा जमोल एन्थोनी फ्रान्कोइसले गोल गर्दै फ्रेन्ड्सलाई पहिलो हाफमा ३–१ को अगता दिलाए । निसेन सुब्बाको फ्रिकिकलाई जमोल एन्थोनीले हेडमार्फत गोल गर्न सफल भएका थियो ।