काठमाडौं (हाम्रो खेलकुद) – विंगर फरवार्ड रवि शंकर पासवानको दुई गोल मद्दतमा विभागीय नेपाल पुलिस क्लबले कतार एअरवेज सहिद स्मारक ‘ए’ डिभिजन लिगमा दोस्रो जित निकालेको छ ।

पुलिसले र च्यासल युथ क्लबलाई २–१ ले पराजित गर्दै लिगमा महत्वपूर्ण जित निकालेको हो । त्रिपुरेश्वरस्थित दशरथ रंगशालामा बुधबार भएको खेलमा पुलिसको जितमा दुवै गोल रवि शंकरले गर्दा च्यासलका मोउसा एवांगाले एक गोल फर्काए ।

खेलको दोस्रो मिनेटमा सुमन लामाको कर्नरमा सुमन सुवेदी हुँदै आएको हेडरमा अजित भण्डारीको हेडरलाई च्यासलका गोलरक्षक अर्पण कार्कीले सहजै नियन्त्रणमा लिए । २४औं मिनेटमा तेज तामाङको पेनालटी बक्सबाहिरको प्रहार पहिलो बार च्याप्दै थोरै बाहिरिदा पुलिस अग्रता लिनबाट चुक्यो । २७औं मिनेटमा मोउसा एवांगाको बक्स बाहिरको प्रहारले पोस्टको दिशा लिन सकेन ।

३७औं मिनेटमा रविले गोल गर्दै पुलिसलाई १–० को अग्रता दिलाए । निर कुमार राईको पासमा रविले गरेको क्रस दोस्रो बार च्याप्दै गोलमा परिणत हुँदा गोलरक्षक अर्पण कार्कीले बचाउने प्रयास गरेपनि सफल हुन सकेन । ५१औं मिनेटमा कमल श्रेष्ठको फ्रिकिकलाई पुलिसका गोलरक्षक शत्रुघन कुमार चौधरीले पञ्च गर्दै बचाए ।

५३औं मिनेटमा मौउसा एवांगाले पेनाल्टीमा गोल गर्दै खेललाई १–१ गोलको बराबरीमा ल्याए । रुमेश बर्ताैलालाई पेनाल्टी बक्समा लडाएपछि रेफ्री सुमन श्रेष्ठले च्यासललाई पेनाल्टी दिएको थियो । जसमा मोउसा चुकेनन् । ६२औं मिनेटमा रुमेश बर्ताैलाको प्रहारलाई गोलरक्षक शत्रुघनले डाइभ दिदै बचाए ।

६९औं मिनेटमा रविले व्यक्तिगत दोस्रो गोल गर्दै पुलिसलाई २–१ ले अघि बढाए । सुमन लामाको पासमा रविले कप्तान विराज महर्जनलाई विट गर्दै दोस्रो बार च्याप्दै गरेको प्रहारलाई अर्पणले बचाउने प्रयास गरेपनि सफल हुन सकेन ।

८२औं मिनेटमा कमल श्रेष्ठको कर्नरमा अभिषेक लिम्बुको हेडर क्रसबारमा लागेर फर्कदा च्यासल बराबरीबाट चुक्यो । ८७औं मिनेटमा विकास मेराग्लियाको प्रहार फितलो बनेपनि सब्सिच्युट कर्ण लिम्वुले सुवर्ण अवसर गुमाउँदा च्यासल बराबरीबाट चुक्यो ।

इन्ज्युरी समयको थप गरिएको चौथो मिनेटमा यान्निक केट्चाको प्रहार हेमन्त श्रेष्ठलाई डिफ्लेक्ट हुदै पोलमा लागेर बाहिरिदा च्यासल बराबरीबाट चुक्यो । लगत्तै कर्नरमा अभिषेकको हेडर सदुपयोग हुन नसक्दा च्यासल पराजित हुन पुग्यो ।

जितपछि पुलिस ९ खेलबाट १० अंक जोडेर १०औं स्थानमा उक्लिएको छ । समान १० अंक नै रहेपनि एपिएफ बढी गोलको आधारमा नवौं स्थानमा रहेको छ ।

पुलिससँगको हारसँगै च्यासललाई रेलिगेसनको दवाव बढेको छ । ९ खेलबाट ५ अंक जोडेर च्यासल १३औं स्थानमा रहेको छ । अब च्यासलले लिगको बाँकी चार खेलमा जित हात पारेर मात्रै पुग्दैन अन्य टोलीको नतिजा पनि हेर्नुपर्ने हुन्छ ।

पुलिसले २ जित, ४ बराबरी र ३ हारको नतिजा निकालेको छ । खेलाडी अनुबन्धमा आक्रामक देखिएको च्यासलले लगातार खराव प्रदर्शन गर्दा ९ खेलमा १ जित, २ बराबरी र ६ हारको नतिजा निकालेको छ ।