काठमाडौं (हाम्रो खेलकुद) – विभागीय नेपाल पुलिस क्लबले कतार एअरवेज सहिद स्मारक ‘ए’ डिभिजन लिग अन्तरगत च्यासल युथ क्लबविरुद्ध पहिलो हाफमा अग्रता लिएको छ ।

रवि शंकर पासवानको गोलमा पुलिसले च्यासलविरुद्ध पहिलो हाफमा १–० को अग्रता लिएको हो । त्रिपुरेश्वरस्थित दशरथ रंगशालामा बुधबार भएको खेलको ३७औं मिनेटमा रविले गोल गर्दै पुलिसलाई अग्रता दिलाएका हुन् ।

निर कुमार राईको पासमा रविले गरेको क्रस दोस्रो बार च्याप्दै गोलमा परिणत हुँदा गोलरक्षक अर्पण कार्कीले बचाउने प्रयास गरेपनि सफल हुन सकेन । त्यसअघि खेलको दोस्रो मिनेटमा सुमन लामाको कर्नरमा सुमन सुवेदी हुँदै आएको हेडरमा अजित भण्डारीको हेडरलाई च्यासलका गोलरक्षक अर्पण कार्कीले सहजै नियन्त्रणमा लिए ।

२४औं मिनेटमा तेज तामाङको पेनालटी बक्सबाहिरको प्रहार पहिलो बार च्याप्दै थोरै बाहिरिदा पुलिस अग्रता लिनबाट चुक्यो । २७औं मिनेटमा मोउसा एवांगाको बक्स बाहिरको प्रहारले पोस्टको दिशा लिन सकेन ।

पुलिस ८ खेलबाट ७ अंक जोडेर ११औं स्थानमा रहेको छ । पुलिसले १ खेलमा जित हात पार्दा ४ बराबरी र ३ हारको नतिजा निकालेको छ । खेलाडी अनुबन्धमा आक्रामक देखिएको च्यासलले लगातार खराव प्रदर्शन गर्दा ८ खेलबाट ५ अंक जोडेर रेलिगेसन खतरासहित १३औं स्थानमा रहेको छ । च्यासलले १ जित, २ बराबरी र ५ हारको नतिजा निकालेको छ ।