लिगको १०औं चरणको खेल शुक्रबारदेखि

काठमाडौं (हाम्रो खेलकुद) – कतार एअरवेज सहिद स्मारक ‘ए’ डिभिजन लिग अन्तरगतको १०औं चरणको खेलहरु शुक्रबारदेखि शुरु हुने भएको छ ।

अखिल नेपाल फुटबल संघ (एन्फा) ले मंगलबार लिगको बाँकी रहेको चारै राउन्डको खेल तालिका सार्वजनिक गरेको छ । अन्तिम राउन्ड अर्थात १३औं राउन्डको समय र भेन्यु तोकिएको छैन । दशथ रंगशालासँगै विकल्पको रुपमा एन्फा मैदान र पोखरा रंगशालालाई राखेको छ ।

१०औं देखि १२औं राउन्डसम्मको खेल २८ माघबाट शुरु भएर १० फागुनमा सकिनेछ । १०औं राउन्डको पहिला खेलमा फ्रेन्ड्स क्लब र ब्रिगेड ब्वाइज क्लब (बीबीसी) बीच प्रतिस्पर्धा हुनेछ । सोही दिन त्रिभुवन आर्मी फुटबल क्लब र जावलाखेल युथ क्लबबीच प्रतिस्पर्धा हुनेछ ।

साविक विजेता मछिन्द्र फुटबल क्लब अपराजित रहँदै ९ खेलबाट २३ अंक जोडेर शीर्षस्थानमा रहेको छ । मनाङ १९ अंक जोडेर दोस्रो स्थानमा रहेको छ । च्यासल ५ अंक जोडेर १३औं तथा फ्रेन्ड्स ३ अंक जोडेर रेलिगेसन जोनमा रहेको छ ।

लिग अन्तरगतको नवौं चरणको पुलिस र च्यासल युथ क्लबबीचको स्थगित खेल बुधबार हुँदैछ ।