काठमाडौं (हाम्रो खेलकुद)– कतारमा घुँडाको शल्यक्रियालगायतको उपचार सकेर राष्ट्रिय महिला फुटबल टोली तथा एपिएफकी फरवार्ड सावित्रा भण्डारी साम्बा मंगलबार स्वदेश आइपुगेकी छन् ।

७ महिना भन्दा लामो समयपछि उनी स्वदेश फर्केकी हुन् । उपचारका लागि उनी असार १२ गते कतार गएकी थिइन् । सावित्राको असार ३१ गते कतारको दोहामा रहेको अस्पेटार अस्पतालमा दायाँ घुँडाको शल्यक्रिया भएको थियो । अखिल नेपाल फुटबल संघ (एन्फा) को पहलमा कतार फुटबल संघले उनको उपचार गराइदिएको हो । उनलाई अखिल नेपाल फुटबल संघ (एन्फा) का उपाध्यक्ष शिक्षित पराजुली, महिला समितिकी संयोजक पेमा लामा, संगिना वैद्यलगायतले त्रिभुवन अन्तर्राष्ट्रिय विमानस्थलमा स्वागत गरेका थिए ।

राष्ट्रिय लिग खेल्ने क्रममा गत वर्ष फागुन ३ गते उनको घुँडामा चोट लागेको थियो । झन्डै ८ वर्षे खेल जीवनमा सावित्राले पहिलो पटक गम्भिर खालको चोटबाट गुज्रनु परेको थियो । कतार फुटबल संघले नेपाली खेलाडीहरुलाई समय समयमा उपचारमा सहयोग गर्दै आएको छ । सावित्रा अघि नै राष्ट्रिय पुरुष टोलीका विमल घर्तिमगरले पनि सोही अस्पतालमा उपचार गराएका थिए ।

सावित्राको नाममा राष्ट्रिय फुटबल टोलीबाट सर्वाधिक ३८ गोलको कीर्तिमान छ । सावित्रा नेपालको मात्र नभई दक्षिण एसियाकै उत्कृष्ट फरवार्डमा परिचित छिन् । नेपाली फुटबलमा एपिएफले वर्चस्व जमाउँदा उनले इन्डियन लिग (आई लिग) दुई फरक क्लबबाट खेलेकी छिन् । दुवैपटक उनी खेलेको टोली आइ लिग च्याम्पियन बनेको थियो । गत वर्ष गोकुलमलाई च्याम्पियन बनाउन महत्वपूर्ण भूमिका निर्वाह गरेकी उनी आइ लिगको सर्वाधिक गोलकर्ता पनि बनेकी थिइन् ।