काठमाडौं (हाम्रो खेलकुद)– कतारमा घुँडाको शल्यक्रिया र त्यसपछिको उपचारका विभिन्न चरण पूरा गर्दै राष्ट्रिय महिला फुटबल टोली तथा एपिएफकी फरवार्ड सावित्रा भण्डारी साम्बा मंगलबार स्वदेश फर्कन लागेकी छन् ।

७ महिना भन्दा लामो समयपछि उनी स्वदेश फर्कन लागेकी हुन् । उपचारका लागि उनी असार १२ गते कतार गएकी थिइन् । सावित्राको असार ३१ गते कतारको दोहामा रहेको अस्पेटार अस्पतालमा दायाँ घुँडाको शल्यक्रिया भएको थियो । अखिल नेपाल फुटबल संघ (एन्फा) को पहलमा कतार फुटबल संघले उनको उपचार गराइदिएको हो ।

आइतबार भएको परिक्षणमा सबै कुरा सामान्य देखिएपछि डाक्टरले अब स्वदेश फर्कन मिल्छ भन्नुभएकोले आउन लागेकी हुन, हाम्रो खेलकुदसँग सावित्राले भनिन्, अब फर्केपछि केही साता ग्राउण्ड रिह्याब गर्छु । सुरुमा एक्लै र पछि समूहमा प्रशिक्षण गर्छु। के केसरी अभ्यास गर्ने सबै यहाँ भन्नुभएको छ।’

राष्ट्रिय लिग खेल्ने क्रममा गत वर्ष फागुन ३ गते उनको घुँडामा चोट लागेको थियो । झन्डै ८ वर्षे खेल जीवनमा सावित्राले पहिलो पटक गम्भिर खालको चोटबाट गुज्रनु परेको थियो । कतार फुटबल संघले नेपाली खेलाडीहरुलाई समय समयमा उपचारमा सहयोग गर्दै आएको छ । सावित्रा अघि नै राष्ट्रिय पुरुष टोलीका विमल घर्तिमगरले पनि सोही अस्पतालमा उपचार गराइरहेका छन् ।

सावित्राको नाममा राष्ट्रिय फुटबल टोलीबाट सर्वाधिक ३८ गोलको कीर्तिमान छ । सावित्रा नेपालको मात्र नभई दक्षिण एसियाकै उत्कृष्ट फरवार्डमा परिचित छिन् । नेपाली फुटबलमा एपिएफले वर्चस्व जमाउँदा उनले इन्डियन लिग (आई लिग) दुई फरक क्लबबाट खेलेकी छिन् । दुवैपटक उनी खेलेको टोली आइ लिग च्याम्पियन बनेको थियो । गत वर्ष गोकुलमलाई च्याम्पियन बनाउन महत्वपूर्ण भूमिका निर्वाह गरेकी उनी आइ लिगको सर्वाधिक गोलकर्ता पनि बनेकी थिइन् ।

सावित्राले आफू छिट्टै मैदान फर्कनेमा आशावादी देखिएकी छिन् । ‘सोचे जस्तै उपचार पाएकी छु । आउने दिने मेरा लागि चुनौतीपूर्ण नै हुनेछन्,’ उनले भनिन्, ‘त्यसका लागि म मानसिक रुपमा तयार छु । पहिला भन्दा पनि मिहिनेत गरेर मैदान फर्कदै देश र क्लबका लागि खेल्नेछु । यो कठिन समयमा साथ र सहयोग दिने सबैलाई धन्यवाद दिन चाहान्छु ।’