एजेन्सी – च्याम्पियनसिप टोली नटिङघम फरेस्टसँग लज्जास्पद हार बेहोर्दैसाविक विजेता तथा प्रिमियर लिग क्लब लेस्टर सिटी एफए कपको चौथो चरणबाटै बाहिरिएको छ । घरेलु टोली नटिङघम फरेस्टसँग ४–१ को लज्जास्पद हार बेहोर्दै लेस्टर अन्तिम ३२ बाटै बाहिरिएको हो ।

लेस्टरलाई हार चखाउन फिलिप जिन्केरनागेल, ब्रेनान जोन्सन, जोई वोरोल र डिजेड स्पेन्सले गोल गरे । लेस्टरका केलिची इहानाँचोले एक गोल फर्काए । नटिङघम फरेस्टले पहिलो हाफमा ३–१ को आरामदायी अग्रता लिदा दोस्रो हाफमा एक गोल थप्दै जित पक्का गरेको थियो ।

दि सिटी ग्राउन्ड नटिङघममा आइतबार राति भएको खेलको २३औं मिनेटमा फिलिप जिन्केरनागेलको गोलबाट नटिङघमले अग्रता बनाएको थियो । त्यसको एक मिनेटपछि ब्रेनान जोन्सनले गोल गर्दै नटिङघमको अग्रता दोब्बर पारे ।

३२औं मिनेटमा जोई वोरोलले गोल रगेपछि नटिङघम खेलमा ३–० को बलियो स्थितिमा पुग्यो । ४०औं मिनेटमा केलिची इहानाँचोले गोल गर्दै खेललाई पहिलो हाफमा ३–१ को अवस्थामा ल्याउँदै लेस्टरलाई खेलमा फर्कने संकेत दिएपनि दोस्रो हाफमा थप एक बेहोरेपछि लेस्टर पराजित हुदै बाहिरियो ।

६१औं मिनेटमा डिजेड स्पेन्सले गोल गर्दै टोलीको जित सुनिश्चित गरे । लेस्टरले बल पोसेसन राखेपनि गोल गर्न नसक्दा लज्जास्पद हार बेहोर्दै बाहिरिन पुग्यो ।