पोखरा (हाम्रो खेलकुद) – मोफसलको प्रतिष्ठित आहा रारा गोल्डकप फुटबल प्रतियोगिताको २०औं संस्करणमा शनिबार फाइनलमा प्रतिस्पर्धा हुँदा नयाँ इतिहास कायम हुनेछ । मनाङ मर्स्याङ्दी क्लब र विभागीय नेपाल एपिएफ फुटबल क्लब जसले जिते पनि आहा रारामा नयाँ इतिहास कायम हुनेछ ।

सहारा क्लब पोखराले आयोजना गरेको प्रतियोगितामा मनाङ सर्वाधिक ६ पटकको च्याम्पियन हो । विभागीय नेपाल पुलिस क्लबले पनि ६ पटक उपाधि जितेका छन् । त्यसैले मनाङ २०औं संस्करणको उपाधि उचालेर उपाधिमा नयाँ कीर्तिमान कायम गर्न चाहन्छ । यस्तै, एपिएफ १४ वर्षपछि फाइनल प्रवेश गर्दा पहिलोपटक च्याम्पियन बन्ने दाउमा हुनेछ ।

१२ पटक फाइनल यात्रा तय गरिसकेको मनाङका प्रशिक्षक फुजा तोपेले आफ्नो टिमले खेल जित्ने विश्वास राखेका छन् । कप्तान बिमल रानाले होम ग्राउण्ड पोखरा रंगशालामा फेरि उपाधि जित्ने दाबी गरे ।

एपीएफ प्रशिक्षक कुमार थापाले विपक्षी राम्रो टिम भएकाले सोही अनुरुप रणनीति बनाएर मैदान उत्रिने बताए । आफ्ना खेलाडीको प्रदर्शनबाट सन्तुष्ट रहेको भन्दै उनले उपाधि आफेनो टिमले जित्ने दाबी गरे ।

थापाले भने, ‘जसरी पोखरामा सहाराले महामारीकाबीच प्रतियोगिता आयोजना गर्यो, त्यहि अनुरुप नै हामीले पनि तयारी गरिरहेका छौं । सहाराको दुखलाई हामीले हेरेर न्यायसंगत तरिकाले नै प्रस्तुत हुनेछौं ।’ एपिएफ यसअघि छैटौं संस्करणमा मात्र फाइनल पुगेर उपविजेतामै सीमित भएको थियो ।

उद्घाटनमा आयोजक सहारा क्लबलाई, क्वाटरमा पाहुना टोली अमेरिकी वाइएससी मिनिसोटा र सेमिफाइनलमा मछिन्द्र फुटबल क्लबलाई हराउँदै एपिएफ फाइनल पुग्दा मनाङ क्वाटरफाइनबाट मैदान उत्रिएको हो । उसले नेपाल पुलिस क्लबलाई हराउँदै सेमिफाइनल पुगेमो विभागीय त्रिभुवन आर्मी फुटबल क्लबलाई पराजित गर्दै फाइनल यात्रा तय गरेको हो ।

विजेताले १० लाख र उपविजेता टिमले ५ लाख प्राप्त गर्ने छन् । यस्तै, विधागत रुपमा पनि पुरस्कार व्यवस्था गरिएको छ । गत ६ माघ देखि सुरु प्रतियोगितामा १० टिमले भाग लिएका थिए ।