काठमाडौं (हाम्रो खेलकुद) – नेपाली राष्ट्रिय फुटबल टोलीले शनिबार अफ्रिकी राष्ट्र मौरिससविरुद्ध अन्तर्राष्ट्रिय मैत्रीपूर्ण खेल खेल्दैछ । दुई खेल अन्तर्गत शनिबार दशरथ रंगशालामा खेल्नुअघि दुवै टोलीका कप्तान र प्रशिक्षकले आ-आफ्नो धारणा राखे ।

नेपाली टोलीका कप्तान किरण चेम्जोङले मौरिससविरुद्ध खेल टोलीका लागि फरक अनुभव हुने बताए । ‘हामीले अफ्रिकी राष्ट्रसँग पहिलो पटक खेल्न लागेका छौं । फरक अनुभव हुनेछ । हामी मैदानमा सधैं जितको लागि नै खेल्न जान्छौं । यसपटक पनि सोही लक्ष्य रहनेछ,’ उनले भने ।

किरण माल्दिभ्सबाट दुई दिनअघि मात्र नेपाल आइपुगेका हुन् । व्यावसायिक फुटबल खेल्न माजिया स्पोर्ट्स एन्ड रिक्रिएसनमा आबद्ध किरणको टोलीले आइतबार भएको माल्दिभ्सको प्रेसिडेन्ट कपको फाइनलमा क्लब भ्यालेन्सियासंग हार बेहोरेको थियो । किरणले विहीबारदेखि राष्ट्रिय टोलीसँग प्रशिक्षण थालेका थिए ।

प्रशिक्षक अब्दुल्लाह अलमुताइरीले यसपटक दुई मैत्रीपूर्ण खेलका लागि ३४ सदस्यीय प्रारम्भिक टोलीका सबै खेलाडी समेट्दै दुई खेलका लागि फरक टोली घोषणा गरेका छन् । प्रशिक्षकको योजनाबारे भने आफूलाई खास जानकारी नभएको कप्तान किरणले बताए । उनले लिगको प्रदर्शनको आधारमा छनोट परेका खेलाडीको हौसला बढाउन यस खेलले सहयोग गर्ने विश्वास व्यक्त गरे ।

अखिल नेपाल फुटबल संघ (एन्फा) का अनुसार दशरथ रंगशालाको सिट क्षमताको एक तिहाइ दर्शकलाई राखेर खेल सञ्चालन गर्ने जनाएको छ । रंगशालाको दर्शक क्षमता १६ हजार ५ सय रहेको बताइन्छ । त्यसअर्थ झण्डै ५ हजार दर्शकले मैत्रीपूर्ण खेल रंगशाला पुगेर हेर्ने पाउने अखिल नेपाल फुटबल संघ (एन्फा) का महासचिव इन्द्रमान तुलाधरले बताएका छन् ।

नेपाल र मौरिससबीच शनिबार र मंगलबार दुई मैत्रीपूर्ण खेल हुनेछ । खेल दिउँसो ४:४५ बजे सुरु हुने बताइएको छ । त्यसका लागि मौरिसस टोली सोमबार काठमाडौं आइसकेको छ ।

एन्फाले रंगशालाको भिआइपीतर्फ प्रति टिकट १ हजार र साधारणतर्फ ५ सय रुपैयाँ तोकेको छ । स्वास्थ्य मापदण्ड अपनाई सञ्चालन गरिने खेलमा दर्शकले अनिवार्य रुपमा खोप लगाएको कार्ड लिएर जानुपर्ने एन्फाले बताएको छ ।

यो पनि : मौरिससविरुद्ध १२ खेलाडी दुवै टोलीमा समावेश