काठमाडौं (हाम्रो खेलकुद) – नेपाली राष्ट्रिय फुटबल टोलीसँग दुई मैत्रीपूर्ण खेल खेल्न आएको अफ्रिकी राष्ट्र मौरिससको ४ खेलाडीमा कोरोना संक्रमण देखिएको छ ।

भ्रमणकारी मौरिससको राष्ट्रिय टोली सोमबार दिउँसो नेपाल आइपुगेको थियो । नेपाल आएपछि गरिएको कोरोना परिक्षणमा ४ खेलाडीमा संक्रमण देखिएको मौरिसस टोलीले जनाएको छ । खेलाडीहरु लोइस मिसेल, वाल्टर सेन्ट मार्टिन, केर्ल्सन अगाथे र हान्स पटाटेमा संक्रमण देखिएको हो । संक्रमित सबैको स्वास्थ्य अवस्था सामान्य रहेको र हाल आइसोलेसनमा रहेको मौरिससले जानकारी दिएको छ ।

मौरिससको टोलीमा दुई जना मात्र गोलरक्षक आएका थिए । त्यसमध्य लोइस मिसेललाई संक्रमण भएको छ । अब टोलीमा केभिन ओब्राएन जान लुइस मात्र गोलरक्षकको रुपमा रहेका छन् । नेपालले पहिलो खेल शनिबार खेल्ने हुनाले संक्रमण भएका ४ खेलाडी खेल्नेमा शंका रहेको छ ।

नेपालले भने आफ्नो अन्तिम २३ सदस्यीय टोली घोषणा गरेको छैन । प्रशिक्षक अब्दुल्लाह अलमुताइरीले विगत एक सातायता सातदोबाटोस्थित एन्फा कम्प्लेक्समा टोलीलाई नियमित प्रशिक्षण दिइरहेका छन् । हाल प्रारम्भिक छनोटमा ३४ खेलाडी रहेका छन् ।

नेपाल र मौरिससबीच दशरथ रंगशालामा माघ १५ (शनिबार) र माघ १८ (मंगलबार) दुई मैत्रीपूर्ण खेल हुँदैछ । फिफा वरियतामा नेपाल भन्दा मौरिसस केहि पछाडि रहेको छ । नेपाल १ सय ६९ औं र मोरिसस १ सय ७२ औं स्थानमा रहेको छ । नेपालले पहिलो पटक अफ्रिकी टोलीसँग अन्तर्राष्ट्रिय खेल खेल्न लागेको हो ।

यता मौरिससको टोलीले झन्डै २ वर्षपछि अन्तर्राष्ट्रिय खेल खेल्न लागेको हो । कोरोना महामारीका कारण टोलीले पछिल्लो समय अन्तर्राष्ट्रिय खेल खेलेको थिएन । मौरिससमा कोरोनाकै कारण घरेलु फुटबल पनि ठप्प जस्तै छ ।

माल्दिभ्समा असोजमा भएको साफ च्याम्पियनसिपयता नेपाली टोलीले कुनै अन्तर्राष्ट्रिय खेल खेलेको छैन । त्यति बेला पहिलो पटक नेपाली टोली फाइनल पुगेको थियो । नेपालले साफअघि घरेलु मैदानमा भारतविरुद्ध दुई मैत्रीपूर्ण खेल खेलेको थियो । त्यसबेला नेपालले १ बराबरी र १ हारको नतिजा निकालेको थियो ।

मौरिससको टोलीमा रहेका खेलाडी र अफिसियलबारे जानकारी यहाँ लिनुहोस्

मौरिससविरुद्ध खेल्ने नेपाली टोली हालसम्म यस्तो छ