पोखरा (हाम्रो खेलकुद) – पाँच पटकको च्याम्पियन रुस्लान थ्री स्टार क्लबलाई पराजित गर्दै विभागीय त्रिभुवन आर्मी क्लब २०औं संस्करणको आहा रारा गोल्ड कप फुटबल प्रतियोगिताको सेमिफाइनलमा प्रवेश गरेको छ ।

पोखरा रंगशालामा मंगलबार भएको खेलमा थ्री स्टारलाई १–० ले पराजित गर्दै आर्मीले सेमिफाइनलमा मनाङसँगको भेट पक्का गरेको हो । आर्मीलाई अन्तिम चारमा पुर्याउन सब्सिच्युट फरवार्ड राजीव गुरुङले दोस्रो हाफमा गरेको गोल नै निर्णयक बन्यो । उनी मैदान छिरेको सात मिनेटमै गोल गर्न सफल भएका थिए ।

खेलको आठौं मिनेटमा जर्ज प्रिन्स कार्कीको वान भर्सेस वानको अवस्थाको प्रहारलाई गोलरक्षक प्रिसोले बचाउँदा आर्मी अग्रता लिनबाट चुक्यो । निशान खड्काबाट टंक बस्नेतले खोसेको बलमा उनले एक्लै अघि बढाउँदै गरेको प्रहारलाई प्रिसोले अघि बढ्दै बचाउन सफल भएका थिए । २२औं मिनेटमा मिक्चेन तामाङको पेनाल्टी बक्स बाहिरको प्रहार पहिलो बार च्याप्दै थोरै बाहिरियो ।

४३औं मिनेटमा जर्ज प्रिन्स कार्कीको फ्रिकिकलाई प्रिसोले नियन्त्रणमा लिँदा युद्ध शाहीले फउल गर्न पुगेका थिए । ६३औं मिनेटमा जर्ज प्रिन्स कार्कीको झन्डै २५ यार्ड टाढाको सशक्त फ्रिकिकलाई थ्री स्टारका गोलरक्षक प्रिसोले पञ्च गर्दै बचाए ।

७०औं मिनेटमा वैकल्पिक फरवार्ड राजीवले गोल गर्दै आर्मीलाई सुरुवाती अग्रता दिलाए । जर्जप्रिन्स कार्कीको फ्लिकमा अन्तिम डिफेन्डर जीवन गुरुङ मैदानको बीच भागमा चिप्लिन पुग्दा आर्मी भाग्यमानी बनेको थियो । राजीवले झन्डै ३५ यार्ड टाढाबाट गोलरक्षक प्रिसो अघि बढ्दै गरेको अवस्थामा गरेको प्रहारले सहजै जाली चुमेको थियो । उनी ६४औं मिनेटमा टंक बस्नेतको स्थानमा मैदान छिरेका थिए ।

७७औं मिनेटमा जर्ज प्रिन्सको प्रहार दोस्रो बार च्याप्दै बाहिरियो । ८५औं मिनेटमा मिक्चेन तामाङको कर्नरलाई गोलरक्षक विकेशले पञ्च गरेपनि लाकेन लिम्बुको भली प्रहारलाई विजय भुजेलले ओभरहेड कि प्रयास गर्दा आर्मीका भरत खवासले हेड गर्दै बचाए ।

अब आर्मीले फाइनल प्रवेशका लागि बिहीबार मनाङ–मर्स्याङ्दी क्लबको सामना गर्नेछ । मनाङले पुलिसलाई २–० ले पराजित गर्दै अन्तिम चारमा स्थान बनाएको हो । यो सँगै प्रतियोगिताको सेमिफाइनल समिकरण पूरा भएको छ । अब सेमिफाइनलमा बुधबार एपिएफ र मछिन्द्रबीच प्रतिस्पर्धा हुनेछ ।

प्रतियोगितामा ए डिभिजनका ८ सहित १० टोलीले सहभागिता जनाएका छन् । आहा गोल्डकपको विजेताले उपाधिसहित १० लाख १ हजार रुपैयाँ र दोस्रो हुनेले टोलीले ५ लाख १ हजार रुपैयाँ प्राप्त गर्नेछ । प्रतियोगितामा १ करोड ६ लाख ४८ हजार ५ सय रुपैयाँ खर्च हुने अनुमान गरिएको छ ।

पहिलो वर्ष क्याराभान गोल्ड कपसहित २१ वर्षदेखि निरन्तर सञ्चालन भएको यस प्रतियोगितामा बचत हुन आएको रकम क्लबद्वारा संचालित सुर्य बहादुर केसी स्मृति सहारा फुटबल एकेडेमीमा खर्च गरिनेछ । एकेडेमीमा हाल तेस्रो ब्याचमा १४ जिल्लाका २४ जना बालकहरु आश्रित छन् । २०७० साल देखि उनीहरु आवसिय रुपमा निशुल्क स्वास्थ्य, शिक्षा लगायत फुटबल प्रशिक्षण समेत सहारा फुटबल एकेडेमी गण्डकी प्रदेश, पोखरा–१७ स्थित दोविल्लामा प्रदान गर्दै आईरहेका छ ।

आहा रारा गोल्डकपको सम्पूर्ण खेल तालिका तथा नतिजाको लागि यहाँ थिच्नुहोस