एजेन्सी – इटालियन क्लब एसी मिलानका स्वीडिस भेट्रान फरवार्ड ज्लाटन इब्राहिमोभिचले फ्रान्सेली युवा स्टार केलियन एमबाप्पेलाई स्पेनिस क्लब रियल म्याड्रिड जान सुझाव दिएका छन् ।

यसअघि नै एमबाप्पे र रियलको विषयमा बोलिसकेका ज्लाटनले एमबाप्पेलाई पुनः एकपटक रियल म्याड्रिड जानको लागि सुझाव दिएका हुन् ।
एक मिडियासँगको कुराकानीमा ज्लाटनले एक समयमा एमबाप्पेले आँफुसँग कहाँ जादा ठीक होला भनेर प्रश्न गरेको र सो बेला स्पष्टसँग रियल जान सुझाव दिएको बताए ।

‘यो सत्य हो एक दिन एमबाप्पेले मलाई सोधेका थिए । त्यसबेला मैले म तिम्रो ठाँउमा भएको भए रियल जान्थे भनेर जवाफ दिएको थिएँ,’ ज्लाटनले भने । ज्लाटनले फरक–फरक देशमा फरक–फरक टोलीबाट फरक–फरक खेलाडीसँग खेल्दा धेरै कुराहरु सिक्न पाइने पनि बताए ।

‘मैले विभिन्न देशको क्लब र खेलाडीसँग खेल्ने मौका पाए । मैले धेरै कुरा सिक्न समेत पाए । घरेलु वातावरणमा खेल्न धेरै सहज हुन्छ । तर बाहिर खेल्ने हो भने नयाँ कुरा पनि सिकिन्छ । घरदेखि टाढा जानु एउटा साहसिक कार्य हो ।’

४० वर्षीय ज्लाटनले दुई दशकको व्यवसायिक खेल करिअरमा स्वीडेन, नेदरल्यान्ड्स, इटाली, स्पेन, फ्रान्स, इंग्ल्यान्ड र अमेरिकाका विभिन्न क्लबबाट व्यवसायिक खेल खेलिसकेका छन् । उनले एमबाप्पेलाई पिएसजी छाड्न दिएको सुझाव पनि सत्य रहेको बताउँदै पिएसजीका अध्यक्षलाई एमबाप्पेलाई नबेच्नु भनेर पनि सुझाव दिएको बताएका थिए ।

पछिल्लो केही सिजनयता एमबाप्पे र रियलबीच सम्झौताको विषय बाहिर आइरहेको छ । रियल पनि एमबाप्पे अनुबन्धमा आतुर रहँदा एमबाप्पेले पनि रियलबाट खेल्ने चाहना राखेका छन् ।