काठमाडौं (हाम्रो खेलकुद)– चोटग्रस्त राष्ट्रिय फुटबल टोलीका रक्षक अनन्त तामाङ शीर्घस्थास्थ्य लाभको कामनासहित उनका एक समर्थकले हातमा ट्याटु बनाएका छन् । झापामा सुरुङ्गा गोल्डकपको फाइनल खेल्ने तयारीमा रहेका राष्ट्रिय टोलीमा मिडफिल्डर विक्रम लामाले ट्याटुको फोटो फेसबुकमा राखेका छन् । ट्याटुको फोटो राख्दै विक्रमले लेखेका छन्,‘झापामा मैले आज यस्तो देखे । उत्तम समर्थक र सच्चा शुभेच्छुक ।’ उनले अनन्तका लागि लेखेका छन्,‘केही नराम्रो हुने छैन । तिमी छिट्टै ठिक हुनेछौं । गेट वेल सुन’ ।

दस दिन अघि मलेसियामा सम्पन्न सोलिडारिटी कपका दौरान घुडाँमा लागेको चोटका कारण अनन्त कम्तीमा दुई महिना मैदान बाहिर रहनुपर्नेछ । नेपालको उमेर समूहदेखि सिनियर टोलीले पछिल्ला १५ महिनामा प्राप्त गरेका ४ सफलताको महत्वपूर्ण हिस्सा रहेका अनन्तलाई लाओसविरुद्धको खेलमा चोट लागेको थियो । विपक्षी खेलाडीसँग ठोक्किएर उनलाई चोट लागेको थियो । चोटका वावजुद उनले मकाउविरुद्ध फाइनल खेलेका थिए । लाओससँग निर्धारित २–२ को बराबरी भएको खेलमा अनन्तले गोल पनि गरेका थिए । त्यो उनको पहिलो अन्तर्राष्ट्रिय गोल थियो ।
चोटका वाजुद सोलिडारिटी कपको फाइनल खेलेपनि उनले गत शनिबार फ्रेन्ड्स अफ जापानसँगको मैत्रीपूर्ण खेल खेलेनन् । सोलिडारिटी कप, त्यसअघि दक्षिण एसियाली खेलकुद (साग), बंगबन्धु गोल्डकप र साफ १९ उपाधि जित्दा अनन्त सबै टोलीमा थिए । एन्फा एकेडेमीका उत्पादन अनन्तलाई रोहित चन्दको विकल्पका रुपमा पनि हेरिएको छ । उनी सेन्टर डिफेन्डरका रुपमा खेल्दै आएका छन् । लावसविरुद्ध महत्वपूर्ण गोल गरका उनले त्यो खेलमा विपक्षीका दुई खतरनाक आक्रमणलाई रोकेका थिए । त्यसमध्ये एक उनले गोललाइनबाट क्लियर गरेका थिए । चिकित्सकले घुँडाको शल्यक्रिया गर्नुपर्ने सम्भावना रहेको बताएका अनन्तले अब आठ साता भने आराम गर्ने हाम्रो खेलकुदलाई जानकारी दिएका थिए ।