पोखरा (हाम्रो खेलकुद) – आहा रारा गोल्डकप फुटबल प्रतियोगिताको चर्चा गर्दा केहि क्लबको प्रसंग उल्लेख नगर्ने हो भने त्यो अधुरो रहनेछ । त्यसमध्येका दुई क्लब हुन् मनाङ मस्र्याङ्दी क्लब र नेपाल पुलिस क्लब ।

आहा रारा गोल्डकपका सर्वाधिक दुई सफल टोली हुन् पुलिस र मनाङ । २०५८ सालको क्याराभान गोल्डकपलाई समेत छोड्दा लगातार २० वर्ष प्रतियोगिता आयोजना भइसकेको छ । ती २० संस्करणमा १२ पटक मनाङ र पुलिसले जितेका छन् । यि दुई टोलीले समान ६ पटक उपाधि जितेका छन् ।

यि दुई टोलीले आह गोल्डकपमा ४ पटक फाइनल खेलेका छन् । जसमा दुवै टोलीले समान २ पटक उपाधि जितेका छन् । समग्रमा भने आहामा यी दुई टोलीबीच ८ पटक भेट हुँदा मनाङले ५ र पुलिसले ३ पटक जितेको थियो । आहाका यि सर्वाधिक सफल दुई टोलीले यसपटक भने आइतबार क्वार्टरफाइनलमै एकअर्काको सामना गर्दैछन् ।

मनाङले सिधै क्वार्टरफाइनलमा प्रवेश पाएको थियो । पुलिसले भने हिमालयन शेर्पा क्लबको चुनौतीलाई सडन डेथमा पन्छाउँदै मनाङसँगको भेट पक्का गरेको थियो । मनाङ र पुलिसबीचको खेल २ः३० बजे सुरु हुनेछ । लगातार दोस्रो महिना पुलिस र मनाङबीच पोखरा रंगशालामा प्रतिस्पर्धा हुँदैछ ।

गत महिना भने यि दुई टोलीले सहिद स्मारक ए डिभिजन लिगको खेल सोहि रंगशालामा खेलेका थिए । जसमा मनाङ ३–१ ले विजयी भएको थियो । लिगमा नवौं चरणको एक बाहेक सबै खेल सकिदा मनाङ १९ अंकका साथ दोस्रो स्थानमा छ । नवौं चरणको खेल खेल्न बाँकी रहेको पुलिस ७ अंकसहित अंक तालिकाको ११ औं स्थानमा छ ।