एजेन्सी – साविक विजेता अल्जेरिया अफ्रिका कप अफ नेसन्सको समूह चरणबाटै बाहिरिएको छ । बिहीबार राति समूह चरणको अन्तिम खेलमा आइभोरी कोस्टसँग ३–१ ले पराजित हुँदै अल्जेरिया समूह चरणबाटै बाहिरिएको हो ।

समूह चरणमा अल्जेरिया १ अंक जोड्दै पुछारमा रह्यो । अल्जेरियाले सिएरा लिवानसँगमात्रै गोलरहित बराबरी खेल्दा इक्वाटोरियल गिनियासँग १–० को हार बेहोरेको थियो । आइभोरी कोस्ट भने समूह ‘ई’ को विजेता बन्दै नकआउट चरणमा प्रवेश गर्न सफल भयो ।

क्यामरुनमा भइरहेको अफ्रिका कप अफ नेसन्समा आइभोरी कोस्टको जितमा फ्रान्क केस्सी, इब्रामिहम सानगारे र निकोलस पेपेले गोल गरे । अल्जेरियाका सोफिएन बेन्डेब्काले एक गोल फर्काए । अल्जेरियाका रियाद महारेजले पेनाल्टी चुकाएका थिए ।

खेलको २२औं मिनेटमा फ्रान्क केस्सीको गोलबाट आइभोरी कोस्टले सुरुवाती अग्रता लिएको थियो । उनले निकोलस पेपेको पासमा गोल गरेका थिए । ३९औं मिनेटमा इब्राहिमले सर्जी औरिएरको पासमा गोल गर्दै टोलीको अग्रता दोब्बर पारे ।

५४औं मिनेटमा निकोलस पेपेले सेवास्टिन हालेरको पासमा ग गोल गर्दै आइभोरी कोस्टलाई ३–० ले अघि बढाए । ६०औं मिनेटमा महारेजले पेनाल्टी चुकाउँदा अल्जेरिया गोल अन्तर कम गर्नबाट पनि चुक्यो । ७३औं मिनेटमा सोफिएन बेन्डेब्काले गोल गर्दै खेललाई ३–१ को अवस्थामा ल्याएपनि टोलीको हार टार्न सकेन ।

यही समूहको अर्काे खेलमा इक्वाटोरियल गिनियाले सिएरा लिवानलाई १–० ले पराजित गर्दै समूह उपविजेताको रुपमा प्रि–क्वाटरफाइनलमा पुग्न सफल भएको छ । इक्वाटोरियलको जितमा पाब्लो गानेटले ८३औं मिनेटमा गरेको गोल नै निर्णायक बन्यो ।

यो जितपछि इक्वाटोरियलले समुहमा ३ खेलबाट ६ अंक जोड्यो । पराजित रिएरा लिवान समूहको उत्कृष्ट तेस्रो टोलीको रुपमा अघिल्लो चरण पुग्ने सम्भावना जीवित रहेको छ ।