एजेन्सी – दोस्रो श्रेणीको टोली लिसमाथि पूनरागमन जित निकाल्दै सिरी ‘ए’ टोली रोमा कोपा इटालियाको क्वाटरफाइनलमा प्रवेश गरेको छ । घरेलु मैदानमा रोमाले १ गोलले पछि परेको स्थिति उल्ट्याउँदै १० खेलाडीमा समेटिएको लिसलाई ३–१ ले पराजित गर्दै अन्तिमा आठमा स्थान सुरक्षित गरेको हो ।

रोमामा बिहीबार राति भएको खेलमा घरेलु टोलीको जितमा मरास कुम्वुल्ला, ट्याम्मी अब्राहम र इल्डोर सोमुरोडोभले गोल गरे । लिसका आर्टुरो कालाब्रेसीले एक गोल फर्काए । खेलको १४औं मिनेटमा आर्टुरो कालाब्रेसीले एन्टोनियो बारेकाको पासमा गोल गरेपछि रोमा १–० ले पछि परेको थियो । ४०औं मिनेटमा मरास कुम्वुल्लाले बराबरी गोल गर्दै रोमालाई खेलमा फर्र्काए ।

५४औं मिनेटमा ट्याम्मी अब्राहमले गोल गर्दै रोमालाई २–१ को अग्रता दिलाए । उनले निकोलो जानिलोको पासमा गोल गर्न सफल भएका थिए । ६२औं मिनेटमा लिस १० खेलाडीमा समेटिन पुग्यो । मारियो गारगुइलो दोहोरो पहेँलो कार्ड खाँदै मैदानबाट बाहिरिएपछि लिसको खेलमा फर्कने सम्भावना टाढिएको थियो । ८१औं मिनेटमा इल्डोर सोमुरोडोभले हेनरिख मिखटरयानको पासमा गोल गर्दै रोमाको सहज पूनरागमन जित पक्का गरे ।

योसँगै कोपा इटालियाको क्वाटरफाइनल समिकरण पूरा भएको छ । अब क्वाटरफाइनलमा रोमाले इन्टरमिलानसँग खेल्नेछ । यस्तै एटलान्टा र फियोरेन्टिना, युभेन्ट्स र सस्सुलो तथा एसी मिलान र लाजियोबीच प्रतिस्पर्धा हुनेछ । खेलहरु ९ फेब्रुअरीमा हुनेछ ।