काठमाडौं (हाम्रो खेलकुद)– भक्तपुर युनाइटेड एफसी भक्तपुर जिल्ला लिग फुटबलको च्याम्पियन बनेको छ । भक्तपुर जिल्ला फुटबल संघको आयोजनामा सानोथिमिस्थित मध्यपुर युथ एशोसियसनको मैदानमा मंगलबार भएको फाइनलमा भक्तपुर युनाइटेड लोकन्थली एफसीलाई २–१ पराति गर्दै उपाधि जितेको हो ।

भक्तपुर युनाईटेडलाई च्याम्पियन बनाउन मनोज लामा र कृष्ण गुरागाईले समान एक गोल गरे । लोकन्थलीका रोहित गिरीले एक गोल फर्काए । खेलको सातौं मिनेटमा मनोजको गोलबाट भक्तपुर युनाइटेडले अग्रता लिएको थियो । नवौं मिनेटमा कृष्णले गोल गर्दै टोलीको अग्रतालाई दोब्बर पारे । प्रतिष्पर्धात्मक खेलको ७५ औं मिनेटमा पेनाल्टी मार्फत रोहितले गोल गर्दै लोकन्थलीलाई खेलमा फर्काउने प्रयास गरेका थिए । भक्तपुर युनाईटेडले ट्रफीसहित ५० हजार र लोकन्थलीले २५ हजार रुपैयाँ प्राप्त गर्यो ।

लोकन्थलीका रोहित गिरीले प्रतियोगिताको सर्वोत्कृष्ट खेलाडी घोषित भए । उनले निष्ट स्कुलले प्रायोजन गरेको १० हजार रुपैयाँ प्राप्त गरे ।
प्रतियोगिताको उत्कृष्ट गोलकिपर लोकन्थलीका रिजेन हेका, सर्वाधिक ६ गोल गरेका लोकन्थलीकै आशिष थिङ उत्कृष्ट स्कोरर, थिमि युथका समिर श्रेष्ठ उत्कृष्ट रक्षक, भक्तपुर युनाईटेडका हरिश कार्की उत्कृष्ट फरवार्ड र विश्व विनायकका रविन कुटु उत्कृष्ट मिल्डफिल्डर घोषित भए । उत्कृष्ट सबै ले समान ५ हजार रुपैयाँ प्राप्त गरे ।

विजेता, उपविजेता टोलीका खेलाडीलाई अखिल नेपाल फुटबल संघका अध्यक्ष कर्मा छिरिङ शेर्पा, उपाध्यक्ष उपेन्द्रमान सिंह, एन्फाको जिल्ला समन्वय समितिका सहसंयोजक एवम् मध्यपुर युथ एशोसियसनका उपाध्यक्ष अष्टकुमार कवे, भक्तपुर जिल्ला फुटबल संघका अध्यक्ष किशोर हेका, वरिष्ठ उपाध्यक्ष अनिल हेका, नेपाल पत्रकार महासंघ भक्तपुरका अध्यक्ष जगत प्रजापति, प्याव्सन भक्तपुरका अध्यक्ष सुरेन्द्र तुबँजा श्रेष्ठलगायतले पुरस्कृत गरे ।