एजेन्सी – बेल्जियन कप्तान इडेन हाजार्ड यस सिजनको लागि स्पेनिस क्लब रियल म्याड्रिडका मुख्य प्रशिक्षक कार्लाे एन्सेलोटीको योजनाको हिस्सा होइनन् । रियल म्याड्रिड जनवरीमा इंग्लिस क्लब चेल्सीका पुर्वस्टार फरवार्डसँग अलग हुन चाहन्छ ।

हाजार्ड स्पेनिस सुपर कपको लागि साउदी अरेबियाको भ्रमणमा गएपनि उनले सुपर कपको सेमिफाइनल र फाइनल गरी दुई खेलमा कुनै मौका नै पाएनन् । टोली च्याम्पियन बन्न सफल भयो । टोली च्याम्पियन बनेपनि हरेक तस्विरमा उनी कुनैपनि समयमा खुशी देखिएका थिएनन् ।

हाजार्डले रियल छाड्न सक्ने आँकलन गरिन थालिसकेको छ, तर लस ब्लान्कोसलाई थाहा छ कि यो सिजनको बाँकी समयको लागि उनले सोचेजस्तो क्लब फेला पार्न सजिलो हुनेछैन ।

रियललाई हाजार्डको बारेमा जानकारी नहुने विषय नै भएन । खेलाडी वा क्लबका लागि उनले ड्रेसिङ रुममा कुनै समस्या सिर्जना नगरेपनि खेल्ने मौका विरलै पाएका कारण उनी आँफैले असहज महसुस गरिरहेका हुन सक्छन् ।

हाजार्डले रियलको सुपर कपको सफलतापछि विजयोत्सवमा खास सहभागी भएनन् । भिनिसियस जुनियरले कार्लाे एन्सेलोटीको योजनामा प्रभाव पारेपछि ३१ वर्षीय फरवार्ड हाजार्डले खेल्ने मौका नै पाएका छैनन् । एन्सेलोटीले भिनिसियस पछि मार्काे एसेन्सियो र रोड्रिगोलाई नै प्रयोग गरिरहेका छन् ।

हाजार्डले क्याडिज, एथलेटिको बिल्वाओ र एल्केयानोविरुद्ध लगातार तीन खेलमा सुरुवाती रोजाईमा तथा गेटाफेविरुद्ध ४५ दोस्रो हाफमा खेलपनि उनले आफ्नो प्रदर्शनबाट प्रभाव पार्न सकेनन् । एसेन्सियोको चोट र ग्यारेथ बेलको अनुपस्थितिले हाजार्डले बिहीबार राति इल्चेसँग कोपा डेल रेमा खेल्ने अवसर पाउन सक्छन्, तर उनको भविष्य अनिश्चित छ ।

हाजार्ड २०१९ मा चेल्सी छाड्दै रियल मा अनुबन्ध भएका थिए । चेल्सीमा प्रभावशाली प्रदर्शन गरेका हाजार्डले रियल पुगेपछि बढी समय चोट ग्रस्त रहँदा अपेक्षा अनुसारको प्रदर्शन गर्न सकेका छैनन् ।