एजेन्सी – नर्वेजियन युवा फरवार्ड एर्लिङ ब्राउट हालान्ड र थोमस म्युनिएरको समान दुई गोल सहयोगमा बोरुसिया डर्टमुन्डले जर्मन बुन्डेसलिगामा सानदार जित दर्ता गरेको छ ।

घरेलु मैदानमा डर्टमुन्डले फ्रेइवर्गलाई ५–१ को भारी अन्तरले पराजित गरेको हो । सिग्नल इडुना पार्कमा शुक्रबार राति भएको खेलमा घरेलु टोलीको जितमा मोहम्मद दाहुदले पनि एक गोल गरे । फ्रेइवर्गका इम्रीदिन डेमिरोभिचले एक गोल फर्काए । डर्टमुन्डले पहिलो हाफमै तीन गोल फर्काउदा दोस्रो हाफमा दुई गोल थप्दा एक गोल बेहोरेको थियो ।

खेलको १४औं मिनेटमा थोमस म्युनिएरको गोलबाट डर्टमुन्डले सुरुवाती अग्रता लिएको थियो । उनले जुलिएन ब्रान्डको पासमा गोल गर्न सफल भएका थिए । २९औं मिनेटमा म्युनिएरले जुलिएनकै पासमा गोल गर्दै डर्टमुन्डको अग्रता दोब्बर पारे ।

पहिलो हाफको इन्ज्युरी समयको थप गरिएको पहिलो मिनेटमा एर्लिङ ब्राउट हालान्डले गोल गरेपछि डर्टमुन्डले पहिलो हाफमा ३–० को आरामदायी अग्रता लिन सफल भयो । हालान्डले मोहम्मद दाहुदको पासमा गोल गरेका थिए । ६१औं मिनेटमा इम्रीदिन डेमिरोभिचले गोल गर्दै खेललाई ३–१ को अवस्थामा ल्याए ।

७५औं मिनेटमा हालान्डले दाहुदकै पासमा व्यक्तिगत दोस्रो तथा टोलीका लागि चौथो गोल गर्दै डर्टमुन्डलाई फराकिलो जिततर्फ अग्रसर गराए । ८६औं मिनेटमा दाहुदले निको स्कल्जको पासमा गोल गर्दै डर्टमुन्डलाई फराकिलो जित दिलाए ।

यो जितसँगै डर्टमुन्डले शीर्षस्थानको बायर्न म्युनिखसँगको अंक दुरी ३ मा छोट्याएको छ । डर्टमुन्डको १९ खेलबाट ४० अंक छ । एक खेल कम खेलेको बायर्नको ४३ अंक छ । पराजित फ्रेइवर्ग ३० अंक जोडेर चौथो स्थानमा यथावत छ ।