एजेन्सी – प्रिमियर लिग क्लबद्धय चेल्सी र लेस्टर सिटीले फराकिलो जित निकाल्दै एफए कपको चौथो चरणमा प्रवेश गरेका छन् । घरेलु मैदानमा चेल्सीले लिग टुको टोली चेस्टरफिल्डमाथि ५–१ को जित निकाल्दै अन्तिम ३२ मा स्थान सुरक्षित गरेको हो ।

स्टामफोर्ड ब्रिजमा घरेलु टोलीको फराकिलो जितमा टिमो वेर्नर, कलुम हड्सन ओडोई, रोमेलु लुकाकु, एन्ड्रिएस क्रिस्टेन्सेन र हाकिम जियाचले गोल गरे । चेस्टरफिल्डका एकवासी एसान्टेले एक गोल फर्काए । चेल्सीले पहिलो हाफमा ४–० को फराकिलो अग्रता सलदा दोस्रो हाफमा एक गोल थप्दा एक गोल खान पुगेको थियो ।

गोलको वर्षा भएको खेलको छैटौं मिनेटमा टिमो वेर्नरको गोलबाट चेल्सीले सुरुवाती अग्रता लिएको थियो । १८औं मिनेटमा कलुम हड्सन ओडोईले गोल गर्दै चेल्सीको अग्रता दोब्बर पारे ।

२०औं मिनेटमा रोमेलु लुकाकुले तथा ३९औं मिनेटमा एन्ड्रिएस क्रिस्टेन्सेन गोल गरेपछि चेल्सी पहिलो हाफमै मजवुत स्थितिमा पुगेको थियो । ५५औं मिनेटमा हाकिम जियाचले गोल गर्दै चेल्सीलाई ५–० ले अघि बढाए । ८०औं मिनेटमा एकवासी एसान्टेले एक गोल फर्काएपनि हार टान सकेन ।

अर्काे खेलमा लेस्टर सिटीले प्रिमियर लिग प्रतिद्धन्द्धी वाट्फोर्डलाई ४–१ ले पराजित गर्दै अघिल्लो चरणमा पुग्न सफल भएको छ । लेस्टरको जितमा युरी टिलेमान्स, जेम्स म्याडिसन, हार्भे बार्नेस र मार्क अल्ब्राइटनले गोल गर्दा वाट्फोर्डका जोओ पेड्रोले एक गोल फर्काए ।

यस्तै प्रिमियर लिगमा क्रिस्टल प्यालेस, ब्रेन्टफर्ड, ब्राइटन, एभर्टन र साउथह्याम्टनले पनि चौथो चरणमा स्थान पक्का गरेका छन् । यस्तै लिग टु टोली क्याम्ब्रिज युनाइटेडले प्रिमियर लिग क्लब न्यूक्यासल युनाइटेडलाई १–० ले स्तब्ध पार्दै अघिल्लो चरणमा प्रवेश गर्न सफल भएको छ ।